संगमनेर येथील खुनाच्या गुन्ह्यातील आरोपीला पुणे पोलिसांनी ठोकल्या बेड्या

पुणे: अहमदनगर जिल्ह्यातील संगमनेर तालुक्यात घडलेल्या खुनाच्या गुन्ह्यातील फरार आरोपीला पुणे पोलिसांनी मोठ्या शिताफीने पकडले आहे. या प्रकरणातील जखमीला पुण्यातील ससून हॉस्पिटलमध्ये दाखल करून मदतीचे नाटक करणाऱ्या या आरोपीला बंडगार्डन पोलिसांनी ताब्यात घेतले. त्याने चौकशीत गुन्ह्याची कबुली दिली असून, त्याला पुढील कारवाईसाठी आश्वी पोलिसांच्या ताब्यात देण्यात आले आहे.

ही घटना ९ ऑगस्ट २०२५ रोजी घडली होती, जेव्हा संगमनेर तालुक्यातील आश्वी येथे एका तरुणाचा खून झाला होता. याप्रकरणी आश्वी पोलीस स्टेशनमध्ये गुन्हा दाखल करण्यात आला होता. विशेष म्हणजे, गुन्ह्यातील आरोपी आसिफ सलीम शेख (वय २८, रा. आश्वीबुद्रूक, ता. संगमनेर) याने जखमी व्यक्तीला मदत करण्याचा बहाणा करत त्याला पुण्यातील ससून हॉस्पिटलमध्ये दाखल केले होते.

संगमनेर पोलिसांकडून आरोपी ससून हॉस्पिटल परिसरात असल्याची खात्रीशीर माहिती बंडगार्डन पोलीस स्टेशनच्या ससून हॉस्पिटल चौकीचे प्रभारी अधिकारी रंगराव पवार यांना मिळाली. मिळालेल्या माहितीनुसार, पोलीस निरीक्षक रंगराव पवार, पोलीस उपनिरीक्षक स्वप्नील लोहार आणि तपास पथकातील इतर कर्मचाऱ्यांनी ससून हॉस्पिटल परिसरात शोध मोहीम सुरू केली. पोलिसांना पाहून एक संशयित व्यक्ती घाईघाईने पळून जाण्याचा प्रयत्न करत असताना त्याला ताब्यात घेण्यात आले. चौकशीत त्याने आपले नाव आसिफ सलीम शेख असल्याचे सांगितले.

बंडगार्डन पोलिसांनी त्याला आश्वी येथील गुन्ह्याबाबत विचारले असता, त्याने गुन्हा केल्याची कबुली दिली. त्यानंतर, त्याची ससून हॉस्पिटलमध्ये वैद्यकीय तपासणी करून पुढील कायदेशीर कार्यवाहीसाठी त्याला आश्वी पोलीस स्टेशनच्या पोलिसांच्या स्वाधीन करण्यात आले.