'प्रेमभंग' झालेल्यांना इन्स्टाग्रामवर जाळ्यात ओढणाऱ्या टोळीचा पर्दाफाश; राजस्थानमधून दोन आरोपींना अटक

मुंबई: प्रेमभंग झालेल्या तरुण-तरुणींना इन्स्टाग्रामसारख्या सोशल मीडिया प्लॅटफॉर्मवर जाळ्यात ओढून फसवणूक करणाऱ्या राजस्थानमधील एका टोळीचा मुंबई पोलिसांनी पर्दाफाश केला आहे. याप्रकरणी पोलिसांनी राजस्थानच्या श्रीगंगानगर येथून दोन आरोपींना अटक केली असून, त्यांच्याकडून तब्बल १६ लाख १८ हजार रुपयांचा मुद्देमाल जप्त करण्यात आला आहे. पोलिसांनी तरुणाईला अशा फसव्या जाहिरातींपासून सावध राहण्याचे आवाहन केले आहे.

ही घटना १ ऑगस्ट २०२५ रोजी उघडकीस आली, जेव्हा पायधुनी पोलीस ठाण्यात श्रीमती तहावीन इराकी (वय ५२) यांनी तक्रार दाखल केली. त्यांच्या तक्रारीनुसार, अज्ञात चोरट्याने त्यांच्या घरातून १२९ ग्रॅम सोने आणि रोख रक्कम असे एकूण १६ लाख १८ हजार रुपयांचे साहित्य चोरले होते. यावरून पायधुनी पोलीस ठाण्यात गुन्हा दाखल करण्यात आला.

गुन्हे शाखा कक्ष-२ या गुन्ह्याचा समांतर तपास करत असताना फिर्यादीच्या मुलीची चौकशी करण्यात आली. या चौकशीतून असे समोर आले की, तिचे एका तरुणासोबत प्रेमसंबंध होते, मात्र घरच्यांच्या विरोधामुळे त्यांचे बोलणे आणि भेटीगाठी बंद झाल्या होत्या. याच दरम्यान, मुलीने इन्स्टाग्रामवर 'खोया हुआ प्यार पाये २४ घंटे मे', 'लॉस्ट लव्ह बॅक' अशा पोस्ट पाहिल्या. तिने या इन्स्टाग्राम पेजवर आपला मोबाईल नंबर दिला, त्यानंतर आरोपींनी एका मौलवीच्या नावाने तिच्याशी संपर्क साधला. प्रेमसंबंधातील अडथळे दूर करण्यासाठी चांदीची मटकी, सोन्याची माशी, सोन्याचा दिवा, सोन्याचे खिळे अशा वस्तूंची आवश्यकता असल्याचे सांगून आरोपींनी मनी ट्रान्सफरद्वारे पैसे घेतले. तसेच, इतर सामानासाठी लागणारे सोने फिर्यादीच्या मुलीने घरातून चोरून आरोपींना दिले होते.

तांत्रिक विश्लेषणाच्या आधारे गुन्हे शाखा कक्ष-२ च्या पथकाने राजस्थानमधील गंगानगर येथून विकास मनोजकुमार मेघवाल (वय २२) आणि मनोज श्यामसुंदर नागपाल (वय ३०) या दोन आरोपींना अटक केली. चौकशीदरम्यान, आरोपींनी गुन्ह्याची कबुली दिली आणि त्यांच्याकडून चोरीला गेलेले १३ लाख रुपये किमतीचे सोने आणि ३ लाख १८ हजार रुपयांची रोख रक्कम जप्त करण्यात आली. आरोपींनी यापूर्वी दिल्ली आणि हरियाणातील काही तरुणांचीही अशाच प्रकारे फसवणूक केल्याचे निष्पन्न झाले आहे.

या टोळीचे जाळे मोठे असून, गंगानगरमध्ये असे इन्स्टाग्राम अकाउंट्स, बँक खाती आणि सिमकार्ड विकणाऱ्या टोळ्या सक्रिय असल्याचेही दिसून आले आहे. मुंबई पोलिसांनी तरुण-तरुणींना अशा फसव्या जाहिरातींपासून सावध राहण्याचे आवाहन केले आहे, जेणेकरून भविष्यात अशा घटना टाळता येतील.

ही कामगिरी पोलीस आयुक्त देवेन भारती, सहआयुक्त (गुन्हे) लखमी गौतम यांच्यासह वरिष्ठ अधिकाऱ्यांच्या मार्गदर्शनाखाली गुन्हे प्रकटीकरण शाखा, कक्ष-२ च्या पथकाने पार पाडली आहे.