जम्मू-काश्मीरमधील कठुआ जिल्ह्यात ढगफुटी; सात जणांचा मृत्यू, पाच जखमी

कठुआ : जम्मू-काश्मीरमधील कठुआ जिल्ह्यात आज पहाटे ढगफुटी आणि अचानक आलेल्या पुरामुळे (flash flood) दोन वेगवेगळ्या घटनांमध्ये किमान सात जणांचा मृत्यू झाला असून, पाच जण जखमी झाले आहेत. जिल्ह्यातील राजबाग भागातील जोड घाटी गावात ढगफुटीचा सर्वाधिक फटका बसला असून, येथे पाच जणांचा मृत्यू झाला, तर जंगलोट भागात पुरात दोन जणांचा बळी गेला.

घटनेची माहिती मिळताच जिल्हा प्रशासन, पोलीस आणि एसडीआरएफच्या (राज्य आपत्ती प्रतिसाद दल) संयुक्त पथकांनी तातडीने बचावकार्य सुरू केले आहे. जखमींना रुग्णालयात दाखल करण्यात आले आहे. जिल्हा विकास आयुक्त राजेश शर्मा यांनी वरिष्ठ अधिकाऱ्यांसह घटनास्थळी धाव घेतली असून, ते बचाव आणि मदत कार्यावर लक्ष ठेवून आहेत.

जिल्ह्यात झालेल्या मुसळधार पावसामुळे उझ नदीची पातळी धोक्याच्या चिन्हाजवळ पोहोचली आहे. प्रशासनाने नागरिकांना त्यांच्या सुरक्षिततेसाठी नदीपात्रापासून दूर राहण्याचे आवाहन केले आहे. केंद्रीय गृहमंत्री अमित शाह यांनी जम्मू-काश्मीरचे नायब राज्यपाल मनोज सिन्हा आणि मुख्यमंत्री उमर अब्दुल्ला यांच्याशी चर्चा करून केंद्र सरकारकडून सर्वतोपरी मदतीची ग्वाही दिली आहे.