निर्यात धोरण वाढीसाठी वार्षिक उलाढाल व आकर्षक वेष्टन महत्त्वाचे : उदय सामंत

 

रत्नागिरीत आंतरराष्ट्रीय खरेदीदारांशी संवाद कार्यशाळा

रत्नागिरी, दि. ५ जुलै : "भविष्यात किती हजार कोटींची वार्षिक उलाढाल करणार आहे, याचा संकल्प करण्याचा आजचा दिवस आहे," असे प्रतिपादन उद्योगमंत्री डॉ. उदय सामंत यांनी केले. निर्यात धोरण वाढवण्यासाठी वार्षिक उलाढाल वाढवणे आवश्यक असून, त्यासाठी उत्पादनाचा दर्जा आणि सादरीकरणासाठी आकर्षक वेष्टन महत्त्वाचे आहे, असे मार्गदर्शन त्यांनी केले. फेडरेशन ऑफ इंडियन एक्सपोर्ट ऑर्गनाइजेशन, महाराष्ट्र लघु उद्योग विकास महामंडळ (एमएसएसआयडीसी) आणि जिल्हा उद्योग केंद्र यांच्या संयुक्त विद्यमाने रत्नागिरीतील हॉटेल सावंत पॅलेस येथे आयोजित 'आंतरराष्ट्रीय खरेदीदारांशी संवाद' या रिव्हर्स बायर सेलर कार्यक्रमात ते बोलत होते.

या कार्यशाळेला जिल्हाधिकारी एम. देवेंदर सिंह, ऋषीकांत तिवारी आणि जिल्हा उद्योग केंद्राचे महाव्यवस्थापक अजिंक्य आजगेकर उपस्थित होते.

कोकणातील उद्योगांना उच्च पातळीवर नेण्याची इच्छा 

उद्योगमंत्री डॉ. सामंत यांनी कोकणातील आणि महाराष्ट्रातील उद्योजकांनी उच्च पातळीवर जावे, अशी इच्छा व्यक्त केली. जिल्ह्यातील मत्स्यव्यवसाय हा सर्वात मोठा व्यवसाय असल्याचे नमूद करत, मिरकरवाडा जेटीवर साडेतीन हजार कोटींची वार्षिक उलाढाल होत असून, जिल्ह्यात किमान दहा ते बारा हजार कोटींची वार्षिक उलाढाल होते, असे त्यांनी सांगितले. आंब्याच्या व्यवसायावर बोलताना, जिल्हा उद्योग केंद्राने आंबा निर्यातीसाठी प्रयत्न करावेत आणि त्यातील अडचणी दूर कराव्यात, कारण यातून मोठा पैसा निर्माण होऊ शकतो असे ते म्हणाले.

खैर लागवडीतून नवीन उद्योगांना प्रोत्साहन 

सकाळी चिपळूणमध्ये शेतकऱ्यांना साडेपाच लाख खैराची रोपे मोफत वाटप केल्याचा संदर्भ देत डॉ. सामंत म्हणाले, "खैराचे झाड एकदा लावले की वर्षांनुवर्षे टिकते आणि अनेकदा कात, औषध आणि रंगासाठी वापरले जाते. या साडेपाच लाख झाडांमुळे पुढच्या वर्षी रत्नागिरीतील एखादा माणूस कात किंवा रंगाचा कारखाना सुरू करू शकतो." या कार्यशाळेचा उपयोग नवीन उद्योगांना चालना देण्यासाठी व्हावा, अशी त्यांची अपेक्षा होती.

बचत गटांनी निर्यातीकडे वळावे 

पारंपरिक विचारातून बाहेर पडून बचत गटांनी निर्यातीवर आधारित घटक आणले पाहिजेत, असे आवाहनही त्यांनी केले. महाराष्ट्राच्या आर्थिक जडणघडणीला दृढ बनवण्यासाठी हे आवश्यक असल्याचे ते म्हणाले. जांभूळ, करवंद आणि काजूचे सरबत बनवणारे युनिट रत्नागिरीत सुरू व्हायला हवे, यासाठी दृढ आत्मविश्वास आणि आत्मचिंतन आवश्यक असल्याचे उद्योगमंत्र्यांनी नमूद केले.

ओएनडीसी पोर्टलचा वापर करा 

जिल्हाधिकारी एम. देवेंदर सिंह यांनी भारत सरकारने सर्वांना ओएनडीसी पोर्टलवर उत्पादन विक्रीसाठी व्यासपीठ उपलब्ध करून दिले असल्याचे सांगितले. सर्व क्षेत्रात विश्वास आणि निष्ठा असायला हवी, असेही ते म्हणाले.

Export Policy, Industry, Dr. Uday Samant, Ratnagiri, Annual Turnover, Product Packaging, MSME, ONDC Portal

 #ExportPolicy #MaharashtraIndustry #UdaySamant #Ratnagiri #MSME #MakeInMaharashtra #LocalForGlobal