रत्नागिरी, दि. ५ जुलै: एमआयडीसीसाठी शेतकऱ्यांकडून जागा घेताना त्यांच्या हिताला प्राधान्य द्यावे, असे स्पष्ट निर्देश पालकमंत्री डॉ. उदय सामंत यांनी दिले. चिपळूण येथील 'सहकार भवन'मध्ये खडपोली आणि खेर्डी एमआयडीसी परिसरातील नागरिकांच्या समस्यांबाबत आयोजित बैठकीत ते बोलत होते. या भागातील रस्ते आणि पुलांसाठी २७ कोटी रुपयांचा निधी मंजूर करत असल्याची घोषणाही त्यांनी केली. यामध्ये गाणे-खडपोली रस्त्याच्या डांबरीकरणासाठी २ कोटी, वाशिष्ठी नदीवरील पुलासाठी २० कोटी आणि कालव्यावरील पुलासाठी ५ कोटींचा समावेश आहे.
या बैठकीला माजी आमदार सदानंद चव्हाण, चिपळूण नागरी सहकारी पतसंस्थेचे संस्थापक सुभाष चव्हाण, उद्योजक प्रशांत यादव, सूर्यकांत खेतले, उमेश सकपाळ, सपना यादव, संजय मोरे, स्मिताताई चव्हाण आदी मान्यवर उपस्थित होते.
एमआयडीसीतील समस्यांवर तात्काळ उपाययोजना
पालकमंत्री डॉ. सामंत यांनी खडपोली आणि खेर्डी एमआयडीसीतील अनेक गंभीर समस्यांवर प्रकाश टाकत प्रशासनाला त्या तात्काळ सोडवण्याचे निर्देश दिले. खेर्डी एमआयडीसीमध्ये ज्या भूखंडांवर उत्पादन होत नाही, ते भूखंड काढून घेण्याची सूचना त्यांनी केली. खडपोली एमआयडीसीमध्ये सांडपाण्याची योग्य व्यवस्था करावी, असेही ते म्हणाले. प्रदूषण नियंत्रण मंडळाने नियमांचे पालन न करणाऱ्या उद्योजकांचा सर्व्हे करून त्यांना नोटीस बजावण्याचे आदेश दिले. तसेच, कंत्राटी कामगारांना किमान वेतन मिळते की नाही याची खात्री करण्यासाठी तहसीलदारांनी बैठक घेऊन प्रश्न मार्गी लावण्याचे निर्देश दिले.
प्रकल्पग्रस्तांच्या प्रश्नांवर मुख्यमंत्र्यांसोबत बैठक
पोफळी प्रकल्पग्रस्तांचे विविध प्रश्न, विशेषतः ९ हजार जणांना नोकरी देण्याबाबत धोरणात्मक निर्णय घेण्यासाठी मुख्यमंत्र्यांसोबत बैठक घेण्याचे आश्वासन पालकमंत्र्यांनी दिले. यात कोयना प्रकल्पासंबंधीच्या विस्तृत प्रश्नांवरही चर्चा केली जाईल. महावितरणने ११ केव्हीच्या लाईनवरून वीज वितरणासाठी ८ दिवसांत प्रस्ताव सादर करावा आणि डीपी लावण्यासाठी २५ लाख रुपये दिले जातील असेही त्यांनी सांगितले. महानिर्मितीने प्रकल्पग्रस्तांच्या मुलांसाठी वाहन व्यवस्था करावी, असेही सूचित केले. जलसिंचन विभागाची रत्नागिरीत लवकरच बैठक आयोजित केली जाईल, ज्यात अधिकाऱ्यांनी पूर्ण अभ्यास करून उपस्थित राहावे, असेही सामंत म्हणाले. यावेळी खेर्डी एमआयडीसीमधील महिला प्रभाग संघाला भूखंड वाटपाचे पत्र प्रदान करण्यात आले.
चिपळूण नागरी पतसंस्थेचा गौरव
पालकमंत्री डॉ. सामंत यांनी चिपळूण नागरी सहकारी पतसंस्थेच्या कामकाजाचे तोंडभरून कौतुक केले. "ज्या पद्धतीने चिपळूण नागरी सह पतसंस्था चालवली जाते, त्याचा अभिमान जिल्ह्यातील प्रत्येक सहकार क्षेत्रात काम करणाऱ्या कार्यकर्त्याला असला पाहिजे," असे ते म्हणाले. अडीच हजार कोटींची पतसंस्था आदर्शवत कशी चालवायची, याचे हे मूर्तिमंत उदाहरण असल्याचे सामंत यांनी नमूद केले. रत्नागिरी, रायगड, नवी मुंबई आणि पनवेलमध्येही या पतसंस्थेच्या सभागृहासारखे उत्कृष्ट सभागृह नसल्याचे गौरवोद्गार त्यांनी काढले.
MIDC, Farmer Welfare, Infrastructure Projects, Ratnagiri, Dr. Uday Samant, Project Affected Persons, Cooperative Society
#Ratnagiri #MIDC #FarmerWelfare #UdaySamant #Infrastructure #Chipulun #Maharashtra
Reviewed by ANN news network
on
७/०५/२०२५ ०७:११:०० PM
Rating:
कोणत्याही टिप्पण्‍या नाहीत: