खासदार श्रीरंग बारणे गुरुवारी घेणार रेल्वे स्थानकांच्या कामाचा आढावा

 

पिंपरी: मावळ लोकसभा मतदारसंघातील रेल्वे स्थानकांवर सुरू असलेल्या विविध विकासकामांचा आढावा खासदार श्रीरंग बारणे गुरुवारी (15 मे 2025) घेणार आहेत.  

पुणे विभागाचे डीआरएम राजेश वर्मा यांच्यासह संबंधित वरिष्ठ अधिकारी यावेळी उपस्थित राहणार असून, सकाळी नऊ वाजल्यापासून रेल्वे स्थानकांवर आढावा घेतला जाणार आहे.  

केंद्र सरकारने रेल्वे स्थानकांचा विकास करण्यासाठी अमृत भारत स्टेशन योजना सुरू केली आहे. या योजनेत मावळमधील रेल्वे स्थानकांचा समावेश करण्यासाठी खासदार बारणे यांनी पाठपुरावा केला होता. रेल्वे स्थानकांचे विस्तारीकरण, सुशोभीकरण आणि प्रवाशांना चांगल्या सुविधा मिळाव्यात यासाठी ते प्रयत्नशील आहेत.  

त्यांच्या प्रयत्नांमुळे मावळ मतदारसंघातील चिंचवड, आकुर्डी, देहूरोड आणि तळेगाव दाभाडे या चार स्थानकांचा अमृत भारत योजनेत समावेश करण्यात आला. यापैकी आकुर्डी आणि तळेगाव दाभाडे स्थानकांवरील कामे पहिल्या टप्प्यात पूर्णत्वाकडे आहेत.  

खासदार बारणे यांनी पूल, भुयारी मार्ग आणि इतर विकासकामांची माहिती घेतली, तसेच तिसऱ्या आणि चौथ्या रेल्वे मार्गिकेसाठी निधी मिळवण्यासाठी राज्य सरकारकडे पाठपुरावा सुरू असल्याचे सांगितले.  

चिंचवड, लोणावळा, पनवेल आणि नेरळ स्थानकांवरील कामे संथगतीने सुरू असून त्यात दिरंगाई होत असल्यामुळे बारणे यांनी अधिकाऱ्यांसमवेत स्थानकांवर जाऊन कामाचा आढावा घेण्याचा निर्णय घेतला आहे.   

-------------------------

 #SrirangBarne

#AmritBharatStation

#IndianRailways

#RailwayDevelopment

#Maharashtra