शंखनाद महोत्सवात १ हजार वर्षांपूर्वीच्या सोमनाथ ज्योतिर्लिंगाचे दर्शन!

 

२३ देशांतील सहभाग; शंखनाद महोत्सव आध्यात्मिक पर्यटनाचा नवा अध्याय! - सनातन संस्था

पणजी (गोवा) : १७ ते १९ मे २०२५ या काळात फोंडा, गोवा येथील गोवा अभियांत्रिकी महाविद्यालयाच्या मैदानावर सनातन संस्थेद्वारे आयोजित ‘सनातन राष्ट्र शंखनाद महोत्सव’ केवळ धार्मिक नसून, आंतरराष्ट्रीय स्तरावरील आध्यात्मिक जागृतीचा महाकुंभ ठरणार आहे. २३ देशांतील प्रतिष्ठित मान्यवर, विविध संप्रदायांचे संत-महंत, मंदिरांचे विश्वस्त आणि २५ हजारांहून अधिक साधक-भाविक यांच्या उपस्थितीमुळे आणि यज्ञयागामुळे हा महोत्सव काशी, उज्जैन, अयोध्या यांच्याप्रमाणे आध्यात्मिक पर्यटनाचा एक नवीन अध्याय असेल आणि राज्याच्या विकासालाही गती मिळेल, असे प्रतिपादन सनातन संस्थेचे राष्ट्रीय प्रवक्ते श्री. चेतन राजहंस यांनी आज पणजी येथे पत्रकार परिषदेत केले.

पणजीतील ‘हॉटेल मनोशांती’मध्ये झालेल्या पत्रकार परिषदेत आर्ट ऑफ लिव्हिंगचे श्री. संतोष घोडगे, सांस्कृतिक न्यासाचे श्री. जयंत मिरिंगकर, आंतरराष्ट्रीय बजरंग दलाचे श्री. नितीन फळदेसाई, कुंडई तपोभूमी येथील पद्मनाभ संप्रदायाचे श्री. सुजन नाईक, ब्राह्मण महासंघाचे श्री. राज शर्मा, जगद्गुरु स्वामी नरेंद्राचार्य महाराजांचे अनुयायी श्री. अनिल नाईक, गोमंतक मंदिर महासंघाचे श्री. जयेश थळी आणि हिंदु जनजागृती समितीचे श्री. युवराज गावकर उपस्थित होते.

‘सनातन राष्ट्र शंखनाद महोत्सवा’त १ हजार वर्षांपूर्वीच्या सोरटी सोमनाथ ज्योतिर्लिंगाचे दर्शन घेण्याची अनोखी संधी सर्वांना मिळणार आहे. हे शिवलिंग मूर्तीभंजक गझनीने खंडित केले होते, त्यानंतर अग्निहोत्र संप्रदायाच्या साधकांनी त्याचे जतन केले. आता ‘आर्ट ऑफ लिव्हिंग’चे संस्थापक गुरुदेव श्री श्री रविशंकरजी यांच्या आशीर्वादाने हे शिवलिंग महोत्सवाच्या ठिकाणी १७ ते १९ मे दरम्यान दर्शनासाठी ठेवण्यात येणार आहे. यासोबतच छत्रपती शिवाजी महाराजांच्या काळातील शस्त्रास्त्रांचे प्रदर्शनही आयोजित केले जाईल.

काशी विश्वनाथ कॉरिडॉर आणि अयोध्येतील श्रीराम मंदिरामुळे उत्तर प्रदेशला दरवर्षी सुमारे २२ हजार कोटी रुपयांचे उत्पन्न मिळते. यामुळे पर्यटन क्षेत्रात ७ व्या क्रमांकावर असलेले उत्तर प्रदेश आता पहिल्या क्रमांकावर पोहोचले आहे. यावरून आध्यात्मिक पर्यटनामुळे राज्याच्या अर्थव्यवस्थेला किती मोठी चालना मिळू शकते, हे स्पष्ट होते. पूर्वी ‘दक्षिण काशी’ म्हणून ओळखल्या जाणाऱ्या गोव्यालाही याचा निश्चितच लाभ मिळू शकतो. मंदिरे किंवा धार्मिक कार्यांना अंधश्रद्धा मानणाऱ्यांनी हे लक्षात घ्यावे की, मंदिरे ही देशाच्या अर्थव्यवस्थेचा आत्मा आणि कणा आहेत. आज जागतिक स्तरावर औद्योगिक शहरे ओस पडत असताना, उज्जैन, तिरुपती, रामेश्वरम्, काशी यांसारखी तीर्थक्षेत्रे असलेली शहरे हजारो वर्षांपासून टिकून आहेत आणि त्यांच्या परिसराचा विकासही झाला आहे.

शंखनाद महोत्सवामुळे पर्यटनात वाढ: या तीन दिवसीय महोत्सवासाठी देश-विदेशातून २५ हजारांहून अधिक भाविक, साधक आणि प्रतिष्ठित लोक गोव्यात दाखल होणार आहेत. हे सर्वजण येथे ३ ते ५ दिवस मुक्काम करतील, प्रवास करतील, स्थानिक वाहने वापरतील, मंदिरांना भेट देतील, हॉटेल, बाजार, रेस्टॉरंट्स आणि पर्यटन स्थळांचा लाभ घेतील. यामुळे स्थानिक व्यवसाय आणि रोजगाराला मोठी चालना मिळेल. या संपूर्ण प्रक्रियेतून जमा होणारा जीएसटी आणि सेवा कर राज्याच्या उत्पन्नात भर घालणार आहे.

हा महोत्सव उज्ज्वल आध्यात्मिक भविष्यासाठीचा शंखनाद: इतर व्यवसायांच्या तुलनेत आध्यात्मिक पर्यटन हे सुरक्षित आणि शाश्वत विकासासोबतच समाजातील नैतिक मूल्यांची पुनर्स्थापना करणारे आहे. या महोत्सवाच्या माध्यमातून मंदिर परंपरा, लोककला, सांस्कृतिक ओळख, साधना, आध्यात्मिक विचारधारा आणि राष्ट्रनिष्ठ मूल्यांचा जागर केला जाणार आहे. एकूणच ‘शंखनाद महोत्सव’ हा एका उज्ज्वल आध्यात्मिक भविष्याची नांदी आहे.

.................................

#ShankhnaadMahotsav

#SanatanSanstha

#GoaTourism

#SomnathJyotirlinga

#SpiritualAwakening

#ArtOfLiving

#HinduUnity