जेएनपीए चेअरमन यांच्या आश्वासनानंतर शिक्षक-शिक्षकेतर कर्मचाऱ्यांचे उपोषण स्थगित

प्रलंबित मागण्या १५ दिवसांत सोडवण्याची हमी; मागण्या मान्य न झाल्यास पुन्हा आंदोलनाचा इशारा

भविष्य निर्वाह निधी, वेतन निश्चितीकरण आणि थकबाकीच्या देण्यांबाबत बैठकीत निर्णय

जेएनपीए आरकेएफ विद्यालयाचे व्यवस्थापन स्वतःकडे घेणार

६ व्या आणि ७ व्या वेतन आयोगाबाबत ३१ ऑगस्टपर्यंत अहवाल सादर करण्याचे निर्देश

उरण, (प्रतिनिधी): जवाहरलाल नेहरू पोर्ट अथॉरिटी (JNPA) द्वारे चालवल्या जाणाऱ्या आरकेएफ विद्यालयातील शिक्षक आणि शिक्षकेतर कर्मचाऱ्यांनी सुरू केलेले आमरण उपोषण जेएनपीए चेअरमन उन्मेश वाघ यांच्या आश्वासनानंतर स्थगित करण्यात आले आहे. ११ ऑगस्ट रोजी सुरू झालेले हे उपोषण १२ ऑगस्ट रोजी स्थगित करण्याचा निर्णय घेण्यात आला.

कर्मचाऱ्यांनी भविष्य निर्वाह निधी (PF), करारबद्ध कर्मचाऱ्यांचे वेतन निश्चितीकरण, तसेच ६ व्या आणि ७ व्या वेतन आयोगाप्रमाणे थकबाकी आणि भत्ते लागू करणे यांसारख्या प्रलंबित मागण्यांसाठी हे उपोषण सुरू केले होते.

यावर तातडीने लक्ष देत, जेएनपीए चेअरमन उन्मेश वाघ यांनी १२ ऑगस्ट रोजी तातडीची बैठक बोलावली. या बैठकीत त्यांनी कर्मचाऱ्यांचे प्रश्न येत्या पंधरा दिवसांत सोडवण्याची हमी दिली. या आश्वासनानंतर कर्मचाऱ्यांनी उपोषण स्थगित केले. मात्र, ३१ ऑगस्ट २०२५ पर्यंत त्यांच्या मागण्या मान्य न झाल्यास पुन्हा आंदोलन सुरू करण्याचा इशाराही त्यांनी दिला आहे.

या बैठकीत जेएनपीए चेअरमन उन्मेश वाघ, उपाध्यक्ष अनिरुद्ध जोशी यांच्यासह माजी आमदार मनोहर शेठ भोईर आणि कामगार नेते भूषण पाटील उपस्थित होते. बैठकीत जून २०१९ पासून प्रलंबित असलेला भविष्य निर्वाह निधी दोन दिवसांत देण्याची, करारबद्ध कर्मचाऱ्यांच्या वेतन निश्चितीसाठी समिती नेमण्याची आणि लवकरच थकबाकीची देणी अदा करण्याची हमी देण्यात आली.