भारतरत्न अटलबिहारी वाजपेयी यांना पुण्यतिथीनिमित्त विनम्र अभिवादन

पिंपरी-चिंचवड, (प्रतिनिधी): भारताचे माजी पंतप्रधान आणि भारतरत्न अटलबिहारी वाजपेयी यांच्या पुण्यतिथीनिमित्त पिंपरी-चिंचवड येथील भाजपा शहर कार्यालयात त्यांना आदराने अभिवादन करण्यात आले. शहराध्यक्ष शत्रुघ्न काटे यांच्या नेतृत्वाखाली मोरवाडी येथे हा कार्यक्रम पार पडला.

यावेळी बोलताना शहराध्यक्ष शत्रुघ्न काटे म्हणाले की, "अटलबिहारी वाजपेयी हे केवळ एक राजकारणी नव्हते, तर ते एक महान व्यक्तिमत्त्व, दूरदर्शी नेते आणि संवेदनशील कवी होते. त्यांनी आपल्या पंतप्रधानपदाच्या काळात देशाच्या विकासासाठी अनेक महत्त्वपूर्ण निर्णय घेतले. पोखरण अणुचाचणी, लाहोर बस यात्रा आणि सर्व शिक्षा अभियान यांसारख्या त्यांच्या अनेक निर्णयांनी भारताला जागतिक स्तरावर एक मजबूत राष्ट्र म्हणून ओळख मिळवून दिली."

पुढे बोलताना काटे म्हणाले की, वाजपेयीजींनी नेहमीच राजकारणात मूल्यांची आणि नैतिकतेची जपवणूक केली. त्यांच्या पुण्यतिथीनिमित्त त्यांना विनम्र अभिवादन करताना, त्यांच्या विचारांवर चालण्याची आणि देशाच्या प्रगतीसाठी योगदान देण्याची आपण शपथ घेऊया, असे आवाहन त्यांनी केले.

कार्यक्रमाच्या शेवटी वाजपेयी यांच्या स्मृतीप्रित्यर्थ दोन मिनिटे मौन पाळून श्रद्धांजली अर्पण करण्यात आली. या वेळी ओबीसी मोर्चा प्रदेश सरचिटणीस मनोज ब्राह्मणकर यांच्यासह अनेक पदाधिकारी व कार्यकर्ते उपस्थित होते.