एका आरोपीच्या निष्काळजीपणामुळे गोळीबार, पोलिसांनी पर्दाफाश केला संपूर्ण प्रकार

अल्पवयीन मुलावर गुन्ह्याचा ठपका ठेवण्याचा डाव फसला, उत्तमनगर पोलिसांची धडक कारवाई

पुणे, दि. ४ ऑगस्ट २०२५: उत्तमनगर परिसरात गावठी बनावटीच्या पिस्तुलातून गोळीबार करून एका तरुणाला गंभीर जखमी करणाऱ्या पाच आरोपींना उत्तमनगर पोलिसांनी अटक केली आहे. आरोपींनी हा गुन्हा लपवण्यासाठी आणि पोलिसांची दिशाभूल करण्यासाठी बनाव रचला होता, मात्र पोलिसांनी केलेल्या सखोल चौकशीत त्यांचा डाव उधळला गेला.

या घटनेमध्ये सागर प्रदीप कोठारी आणि पार्श्वनाथ शिरीष चकोते यांनी बेकायदेशीररित्या जवळ बाळगलेल्या पिस्तुलातून निष्काळजीपणे गोळी झाडल्याने ती गोळी संकेत संजय मोहिते याच्या उजव्या पायाच्या नडगीवर लागून तो गंभीर जखमी झाला. सुरुवातीला आरोपींनी हा गुन्हा एका अल्पवयीन मुलाने केला असल्याचे पोलिसांना सांगितले. जेणेकरून त्याला कमी शिक्षा होईल आणि ते स्वतः वाचू शकतील. परंतु तपास पथकातील पोलीस उप-निरीक्षक मुकेश कुरेवाड आणि अतुल क्षीरसागर यांना संशय आल्याने त्यांनी अधिक तपास केला.

पोलिसांनी जखमी संकेत मोहिते आणि त्याच्या मित्रांकडे चौकशी केली असता त्यांनी सुरुवातीला खोटी माहिती देऊन पोलिसांची दिशाभूल करण्याचा प्रयत्न केला. मात्र पोलिसांनी केलेल्या सखोल चौकशीत आरोपींचा हा बनाव उघड झाला. या प्रकरणी पोलीस उप-निरीक्षक अतुल क्षीरसागर यांनी स्वतः सरकारतर्फे फिर्याद दाखल केली आहे. पोलिसांनी संकेत मोहिते, सागर कोठारी, पार्श्वनाथ चकोते, जाफर शेख आणि वैभव धावडे या पाच आरोपींना अटक केली असून, त्यांच्यावर भारतीय न्याय संहिता आणि भारतीय हत्यार कायद्यानुसार गुन्हा दाखल करण्यात आला आहे.

ही कारवाई उत्तमनगर पोलीस स्टेशनचे वरिष्ठ निरीक्षक मोहन खांदारे यांच्या नेतृत्वाखालील पथकाने केली. यामध्ये उपनिरीक्षक मुकेश कुरेवाड, अतुल क्षीरसागर, राजनारायण देशमुख यांच्यासह इतर अंमलदार सहभागी होते.