कसबा गणपती मंडळाची भक्ती व समाजसेवेची अभिनव परंपरा कायम

 

वार्षिक रक्तदान शिबिरात २१८ गणेशभक्तांचे रक्तदान

स्वाईन फ्लूच्या कठीण काळात सुरू झालेल्या सेवेचा आज वटवृक्ष

पुणे: पुण्याचे ग्रामदैवत आणि मानाचा पहिला श्री कसबा गणपती मंडळ आयोजित वार्षिक रक्तदान शिबिरात यावर्षी २१८ गणेशभक्तांनी रक्तदान करून गणेशभक्तीला समाजसेवेची जोड दिली आहे. 'भक्ती आणि समाजसेवेचा संगम' साधणाऱ्या मंडळाच्या या अभिनव परंपरेमुळे अनेक गरजू रुग्णांना जीवनदान मिळत आहे. या उपक्रमाचे सर्वत्र कौतुक होत आहे.

श्री देवदेवेश्वर संस्थानचे विश्वस्त रमेश भागवत यांच्या उपस्थितीत उत्सव मंडपात या रक्तदान शिबिराचे आयोजन करण्यात आले होते. या शिबिरात रमणबाग युवा मंच, रुद्र गर्जना, संघर्ष, परशुराम आणि अभेद्य या ढोल पथकांचे कार्यकर्ते, मंडळाचे कार्यकर्ते आणि हितचिंतक मोठ्या संख्येने सहभागी झाले होते.

मंडळाने २००९ मध्ये स्वाईन फ्लूच्या कठीण काळात या उपक्रमाचा पाया रचला होता. त्यावेळी लोक रक्तदान करण्यास कचरत असतानाही मंडळाने धैर्याने हा उपक्रम सुरू केला. तेव्हापासून दरवर्षी या शिबिरात सहभागी होणाऱ्यांची संख्या वाढत आहे. अनेक वर्षांपासून जनकल्याण रक्तपेढीच्या सहकार्याने हा उपक्रम यशस्वीपणे राबवला जात आहे. या शिबिरातून गोळा झालेले रक्त गरजू रुग्णांसाठी वापरले जाते.

मंडळाने या ऐतिहासिक उपक्रमाला यशस्वी करण्यासाठी योगदान देणाऱ्या सर्व रक्तदाते, ढोल पथक, सहकारी संस्था आणि कार्यकर्त्यांचे आभार मानले आहेत.

Ganesh Festival, Pune, Blood Donation, Social Service, Kasba Ganpati Mandal 

 #KasbaGanpati #Pune #Ganeshotsav #BloodDonation #SocialService #GanpatiMandals #PuneriGanesh