ससून रोडवरील जुगार अड्ड्यावर पोलिसांचा छापा; १० आरोपींना अटक, ३५ हजार रुपयांचा मुद्देमाल जप्त

बंडगार्डन पोलीस ठाण्यात गुन्हा दाखल

पुणे शहर पोलिसांच्या गुन्हे शाखा युनिट १ ने ससून हॉस्पिटल रोडवरील एका जुगाराच्या अड्ड्यावर छापा टाकून मोठी कारवाई केली आहे. या कारवाईत १० आरोपींना अटक करण्यात आली असून, त्यांच्याकडून जुगाराचे साहित्य, रोख रक्कम आणि मोबाईल फोन असा एकूण ३५,८५०/- रुपयांचा मुद्देमाल जप्त करण्यात आला आहे.

१९ ऑगस्ट २०२५ रोजी, गुन्हे शाखेला गुप्त बातमीदारामार्फत ससून हॉस्पिटलच्या पाठीमागे असलेल्या एका जुगाराच्या अड्ड्याबाबत माहिती मिळाली. मिळालेल्या माहितीनुसार, गुन्हे शाखेच्या पथकाने रात्रीच्या वेळी छापा टाकला. या छाप्यात जुगार खेळणाऱ्या आणि जुगार चालवणाऱ्या १० आरोपींना ताब्यात घेण्यात आले. त्यांच्याकडून रोख रक्कम, जुगाराचे साहित्य आणि मोबाईल जप्त करण्यात आले.

या प्रकरणी बंडगार्डन पोलीस ठाण्यात महाराष्ट्र जुगार कायदा १९६० च्या कलम ४ आणि ५ अंतर्गत गुन्हा दाखल करण्यात आला आहे. ही कारवाई वरिष्ठ पोलीस अधिकारी पंकज देशमुख, निखिल पिंगळे आणि सतीश गोवेकर यांच्या मार्गदर्शनाखाली करण्यात आली.