सार्वजनिक जीवनात विवेकाचे अधिष्ठान हवे - अविनाश पाटील

गांधी दर्शन शिबिरात विवेकवादावर मंथन

पुणे, (प्रतिनिधी): महाराष्ट्र गांधी स्मारक निधी आणि युवक क्रांती दल यांच्या संयुक्त विद्यमाने आयोजित २३ वे गांधी दर्शन शिबिर रविवार, १० ऑगस्ट २०२५ रोजी गांधी भवन, कोथरूड येथे उत्साहात पार पडले. या शिबिरात गांधी विचारांच्या सखोल अभ्यासासोबतच आधुनिक सामाजिक आव्हानांवर विचारमंथन झाले.

शिबिराचे प्रमुख वक्ते, अंधश्रद्धा निर्मूलन समितीचे अध्यक्ष अविनाश पाटील म्हणाले की, "विवेकवादाचे अधिष्ठान असेल तरच समाजकारण आणि राजकारण यशस्वी होऊ शकते. पाश्चिमात्य तत्वज्ञानातून विवेकवादाची चर्चा झाली असली तरी भारतीय मातीतही विवेकी मांडणी झाली आहे." त्यांनी चार्वाकवाद, बुद्ध तत्त्वज्ञान, जैन, मुस्लीम, शीख विचार तसेच वारकरी परंपरा आणि बसवेश्वरांच्या विचारांमधून विवेकवादाचा पाया कसा मजबूत झाला, हे सांगितले. "संविधानात सर्वसमावेशक विवेकवादाचे प्रतिबिंब पडले असून, समाजात शांतता आणि सुव्यवस्था हवी असेल तर विवेकवाद अपरिहार्य आहे," असेही त्यांनी स्पष्ट केले.

या शिबिरात प्रा. राम पुनियानी यांनी 'गांधी का धर्मविचार' या विषयावर मार्गदर्शन करत गांधीजींच्या धर्मनिरपेक्षतेच्या तत्त्वांचा उलगडा केला. महाराष्ट्र गांधी स्मारक निधीचे विश्वस्त सचिव अन्वर राजन यांनी शिबिराच्या आयोजनामागील भूमिका स्पष्ट करताना सांगितले की, सोशल मीडियावर महात्मा गांधी यांच्याबद्दल होणाऱ्या अपप्रचाराला उत्तर देण्यासाठी आणि त्यांचे मानवतेसाठीचे योगदान पुन्हा समोर आणण्यासाठी अशा शिबिरांचे आयोजन केले जाते.

यावेळी डॉ. रमा सप्तर्षी, ज्ञानेश्वर मोळक, अॅड. स्वप्निल तोंडे, तेजस भालेराव आदी मान्यवर उपस्थित होते. विविध सामाजिक संस्थांचे कार्यकर्ते आणि विद्यार्थ्यांनी मोठ्या संख्येने या शिबिरात सहभाग घेतला. अशा विचारप्रवर्तक उपक्रमांमुळे नव्या पिढीत लोकशाही, अहिंसा आणि सामाजिक बांधिलकीची जाणीव दृढ होते, असे मत उपस्थितांनी व्यक्त केले.