रत्नागिरी जिल्ह्यात पावसाचा जोर कमी, परिस्थिती नियंत्रणात

नद्यांच्या पाणी पातळीत घट; खेड, राजापूरमध्ये जनजीवन पूर्वपदावर

रेड अलर्ट असल्याने गुहागरमध्ये दरडप्रवण भागातील नागरिकांचे स्थलांतर

रस्त्यांवर पाणी आल्याने खेड-दापोली आणि आंबोली घाट मार्ग बंद

रत्नागिरी, (प्रतिनिधी): रत्नागिरी जिल्ह्यात गेल्या काही तासांपासून पावसाचा जोर कमी झाल्यामुळे परिस्थिती हळूहळू नियंत्रणात येत आहे. अनेक नद्यांची पाणी पातळी कमी झाली असून, जनजीवन पूर्वपदावर येण्यास सुरुवात झाली आहे. मात्र, खबरदारीचा उपाय म्हणून काही ठिकाणी वाहतूक अजूनही बंद आहे.

खेड: जगबुडी नदीची पाणी पातळी ७.८० मीटरवरून कमी होऊन ७.४० मीटरवर आली आहे. नदीच्या पाणलोट क्षेत्रात गेल्या दोन तासांपासून पावसाचे प्रमाण कमी झाले आहे. शहरात पाणी शिरलेले नाही. खेड-दापोली रस्त्यावर पाणी साचल्याने वाहतूक बंद आहे.

मंडणगड: मंडणगड तालुक्यात पावसाचा जोर कमी असून, दिवसभरात ६०-७० मिमी पाऊस पडला. किरकोळ पडझडीचे प्रकार घडले असून, जीवितहानी झालेली नाही. तालुक्यातील रस्ते वाहतुकीसाठी सुरू आहेत.

राजापूर: राजापूर शहरातील पाणी ओसरले आहे. जवाहर चौकातील वाहतूक पूर्ववत झाली आहे. नदीची पाणी पातळी ७.४ मीटरवरून ६.६ मीटरवर आली आहे. दिवसभरात ४ घरे आणि एका गोठ्याचे नुकसान झाले आहे.

संगमेश्वर: संगमेश्वर तालुक्यात सोनगिरी, वांद्री आणि आंबेड बुद्रुक येथील काही नागरिकांना सुरक्षित स्थळी हलवण्यात आले आहे. संगमेश्वर बाजारपेठ आणि रामपेठ परिसरातील नदीच्या पातळीत वाढ झाली असून, आठवडा बाजारात पाणी आले आहे. आंबा घाटात दोनवेळा दरड कोसळली होती.

गुहागर: गुहागर तालुक्यात गेल्या एक तासापासून पाऊस कमी झाला आहे. तालुक्यात कुठेही पाणी आलेले नाही आणि वाहतूक सुरळीत सुरू आहे. रेड अलर्ट असल्याने खबरदारी म्हणून दरडप्रवण पाचेरी सडा येथील ८ नागरिकांना नातेवाईकांकडे स्थलांतरित करण्यात आले आहे. जि.प. साकव धोकादायक असल्याने बंद केला आहे. दिवसभरात ३ घरांचे अंशतः नुकसान झाले आहे.

दापोली: दापोली तालुक्यातही पावसाचे प्रमाण कमी झाले आहे. जालगाव, मुरुड, केळशी येथील साचलेल्या पाण्याचा निचरा झाला आहे. करंजाळी येथील गुरांच्या गोठ्याचे आणि लोणवडी येथील ३ घरांचे नुकसान झाले आहे. हर्णै, आसूद आणि दाभोळ येथील २८ व्यक्तींचे नातेवाईकांकडे तात्पुरते स्थलांतर करण्यात आले आहे.