फ़्लिपकार्टने नष्ट करण्यासाठी दिलेला टाकाऊ माल खुल्या बाजारात विकणाऱ्या 'इकोस्टार रिसायकलिंग'चा पर्दाफाश; दोघे अटकेत

ठाणे : ठाणे शहर गुन्हे शाखेने एका मोठ्या गैरव्यवहाराचा पर्दाफाश करत, 'फ्लिपकार्ट' कंपनीकडून नाश करण्यासाठी आलेल्या कालबाह्य (Expiry Date) अन्नधान्य, कडधान्य, खाद्यपदार्थ, कॉस्मेटिक आणि सॅनिटरी उत्पादनांचा नाश न करता, त्याची पॅकिंग बदलून खुल्या बाजारात विक्री करणाऱ्या 'इकोस्टार रिसायकलिंग' कंपनीवर छापा टाकला आहे. या कारवाईत सुमारे ३० लाख रुपये किमतीचा १२ टन माल जप्त करण्यात आला असून, दोन आरोपींना अटक करण्यात आली आहे.

या प्रकरणी 'इको स्टार रिसायकलिंग अँड ई वेस्ट रिसायकलिंग' कंपनीचे मालक मोहम्मद इरफान मोहम्मद मुनीर चौधरी (वय ४१, रा. रूम नं. १, महेंद्र सिंग चाळ, अँथनी चर्च जवळ, खैरानी रोड, साकीनाका, मुंबई) आणि मोहम्मद अक्रम मोहम्मद इस्माईल शेख (वय ५८, रा. घर नं. ७५४, इस्माईल मंजिल अयुब अन्सारी मस्जिदजवळ, गौरीपाडा, भिवंडी, जि. ठाणे) यांच्याविरुद्ध १० जुलै २०२५ रोजी दुपारी २:०३ वाजता शिळ डायघर पोलीस स्टेशन येथे गुन्हा रजि. नं. ७३४/२०२५ अन्वये, भारतीय न्याय संहिता २०२३ च्या कलम ३१८(४), ३३६(२), ३३६ (३), ३४०(२), ३(५) प्रमाणे गुन्हा दाखल करण्यात आला आहे.

९ जुलै २०२५ रोजी गुन्हे शाखा, घटक-१, ठाणे यांना गोपनीय माहिती मिळाली होती की, दहिसर नाका, शिळ-डायघर, ठाणे येथील "इको स्टार रिसायकलिंग" या कंपनीत फ्लिपकार्टकडून आलेला कालबाह्य कडधान्ये, डाळी, आटा, ड्रायफ्रुट्स, साखर, चॉकलेट, कॉस्मेटिक आणि सॅनिटरी उत्पादने नाश न करता बेकायदेशीररित्या खुल्या बाजारात विकली जात आहेत.

या माहितीच्या आधारे, वरिष्ठ अधिकाऱ्यांच्या आदेशानुसार गुन्हे शाखा, घटक-१, ठाणे येथील वरिष्ठ पोलीस निरीक्षक सचिन गायकवाड, पोलीस अधिकारी, अंमलदार आणि अन्न सुरक्षा अधिकारी यांनी कायदेशीर प्रक्रिया पूर्ण करत 'इको स्टार रिसायकलिंग अँड इ-वेस्ट रिसायकलिंग कंपनी'च्या दोन गोदामांवर छापे टाकले. ही गोदामे आरिफ कंपाऊंड, गोडाऊन नं. ६, बँक बडोदा जवळ, जुना मुंब्रा पुणे रोड, दहिसर नाका, ठाणे (५३,००० चौ. फूट) आणि गरीब नवाज इस्टेट, फॅक्टरी नं. ६४२, सर्वे नं. ८, हिस्सा नंबर २/ए, पनवेल रोड, दहिसर, ठाणे (३१,००० चौ. फूट) येथे आहेत.

९ जुलै २०२५ रोजी रात्री ११:३५ वाजेपासून ते १० जुलै २०२५ रोजी दुपारी १२:०० वाजेपर्यंत सलग दोन्ही गोदामांमध्ये तपासणी केली असता, फ्लिपकार्ट कंपनीकडून नाश करण्यासाठी पाठवलेले अंदाजे २०० टन कालबाह्य अन्नधान्य, कडधान्य, विविध कंपन्यांचा आटा (पीठ), साखर, तांदूळ, सर्व प्रकारचे ड्रायफ्रुट्स, टॉयलेट क्लिनर, सॅनिटरी पॅड, वॉशिंग पावडर, साबण असा माल नाश न करता आढळला. या मालाचे मूळ कंपनीचे आवरण फाडून, त्यातील अंदाजे १२,००० किलो (१२ टन) वजनाचा ३० लाख रुपये किमतीचा माल साध्या प्लास्टिकच्या पारदर्शक पिशव्यांमध्ये व गोण्यांमध्ये विक्रीसाठी साठवून ठेवल्याचे उघड झाले. तसेच, 'नवकार रिसायकलिंग दहिसर मोरी, शिळ-डायघर, ठाणे' या कंपनीचे बनावट डिलिव्हरी चलन तयार करून मालवाहतूक करणाऱ्या ड्रायव्हरमार्फत भिवंडी व इतर परिसरात त्याची विक्री करत असल्याचेही निष्पन्न झाले.