ताथवडेतील पशुसंवर्धन केंद्राच्या जागेत सेंट्रल पार्कसाठी मुख्यमंत्र्यांना साकडे

 

खासदार श्रीरंग बारणे यांनी घेतली मुख्यमंत्री, उपमुख्यमंत्र्यांची भेट

पिंपरी : पिंपरी-चिंचवड शहराच्या मध्यवर्ती भागात असलेल्या ताथवडे येथील पशुसंवर्धन केंद्राच्या ६५ हेक्टर जागेत सेंट्रल पार्क उद्यान विकसित करावे, अशी मागणी मावळचे शिवसेना खासदार श्रीरंग बारणे यांनी राज्य सरकारकडे केली आहे. यासाठी त्यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार आणि पशुसंवर्धन मंत्री पंकजा मुंडे यांना निवेदन दिले आहे.  

खासदार बारणे यांनी निवेदनात म्हटले आहे की, ताथवडे परिसर पिंपरी-चिंचवड शहराच्या मध्यभागी आहे. या ठिकाणी पशुसंवर्धन विभागाची ६५ हेक्टर जागा असून, ती ब्रिटिश काळापासून आरक्षित आहे. या जागेत मोठ्या प्रमाणात झाडे आहेत. पिंपरी-चिंचवड शहर वेगाने वाढत असून, शहराचा चारही बाजूंनी विकास होत आहे. मोठ्या गृहनिर्माण संस्था आणि टोलेजंग इमारती बांधल्या जात आहेत. त्यामुळे सिमेंटचे जंगल वाढत असून, शहरात मोठ्या उद्यानाची गरज आहे.  

ताथवडे येथील पशुसंवर्धन विभागाच्या ६५ हेक्टर जागेवर सेंट्रल पार्क उद्यान तयार करणे आवश्यक आहे. उद्यान झाल्यास झाडे वाचतील. तसेच, शहरातून वाहणारी पवना नदी उद्यानाच्या बाजूनेच जाते. नदीलगतच्या जागेत सेंट्रल पार्क उद्यान विकसित केल्यास नागरिकांना त्याचा मोठा फायदा होईल. नागरिकांना शुद्ध हवा मिळेल. थेरगाव येथील बोट क्लब उद्यानाच्या जवळच आहे. त्यामुळे शहरातील नागरिक सकाळी आणि संध्याकाळी जॉगिंग आणि वाकिंगसाठी उद्यानात येऊ शकतील. ज्येष्ठ नागरिकांसाठी हे उद्यान एक हक्काचे ठिकाण होईल.  

खासदार बारणे यांनी निवेदनात पुढे म्हटले आहे की, इतर देशांमध्ये सेंट्रल पार्क उद्यान विकसित केले जाते आणि त्याला नागरिकांचा चांगला प्रतिसाद मिळतो. त्याचप्रमाणे, पिंपरी-चिंचवड शहराच्या मध्यभागी असलेल्या ताथवडे येथे सेंट्रल पार्क उद्यान विकसित करावे. ही जागा कोणत्याही विभागाला न देता महापालिकेकडे हस्तांतरित करावी, जेणेकरून महापालिका या जागेवर सेंट्रल पार्क उद्यान तयार करेल. यामुळे शहराच्या सौंदर्यात भर पडेल आणि नागरिकांना एक मोठे उद्यान मिळेल.

......................................

#CentralParkGarden

#Tathawade

#PimpriChinchwad

#SrirangBarne

#UrbanDevelopment

#GreenSpace

#MaharashtraGovernment