टाकळीहाजीमध्ये धर्मांतर प्रकरणाचा पर्दाफाश

 

सात जणांविरुद्ध गुन्हा दाखल

पिंपरी : शिरूर तालुक्यातील टाकळीहाजी येथील उचाळेवस्तीमध्ये हिंदू देवतांबद्दल अपमानास्पद भाष्य करून ख्रिश्चन धर्मात धर्मांतर करण्यासाठी एका कुटुंबावर दबाव टाकल्याचा धक्कादायक प्रकार उघडकीस आला आहे. सुरुवातीला पोलिसांनी दखल न घेतल्यानंतर, भाजपाचे आमदार महेश लांडगे यांनी आक्रमक भूमिका घेतल्यानंतर शिरूर पोलिस ठाण्यात सात जणांविरुद्ध गुन्हा दाखल करण्यात आला आहे.

घटनेचा तपशील

शेतकरी राहुल मारुती गायकवाड (वय ३९, रा. उचाळेवस्ती-टाकळीहाजी) यांनी दिलेल्या फिर्यादीनुसार, गुरुवारी (१ मे) सायंकाळी सात वाजण्याच्या सुमारास ते आपल्या कुटुंबासह घरासमोर बसले असताना प्रशांत जालिंधर घोडे आणि त्याच्यासोबत सहा अनोळखी व्यक्ती त्यांच्या घरी आले. त्यांनी "तुम्ही कोणत्या धर्माचे?" अशी विचारणा करून, "बायबल वाचा, चर्चमध्ये या, तुमच्यावर प्रभु येशूची कृपा होईल," असे सांगत धर्मपरिवर्तनासाठी दबाव टाकला.

या गटाने "तुमच्या देवांनी काय केलं?" असा सवाल करत हिंदू देवतांबद्दल अपमानास्पद भाष्य केले आणि "प्रभु येशूला मान्य करा, चर्चमध्ये या, आर्थिक फायदा होईल" असे आमिष दाखवले. या प्रकाराने भेदरलेल्या गायकवाड कुटुंबीयांनी पोलिसांकडे धाव घेतली.

पोलिसांची कारवाई

सुरुवातीला पोलिसांनी या घटनेची दखल घेतली नाही. मात्र, आमदार महेश लांडगे यांच्या कानावर हा प्रकार गेल्यानंतर त्यांनी आक्रमक भूमिका घेतली. त्यानंतर शिरूर पोलिस ठाण्यात खालील सात जणांविरुद्ध गुन्हा दाखल करण्यात आला:

1. प्रशांत जालिंधर घोडे (रा. उचाळेवस्ती-टाकळी हाजी)
2. मोजस बार्बनबस डेव्हिड (रा. २०४ लिव्ह गॅलेक्सी, गोकुळ सोसायटी, डोरेबाळा रोड, नागपुर)
3. अमोल विठ्ठलराव गायकवाड (रा. प्लॉट नं. १४६९, आयुषी अपार्टमेंट, न्यु नंदनवन, नागपुर)
4. योगेश संभुवेल रक्षत (रा. ६/१७, रामबाग कॉलनी, मेडीकल चौक, नागपुर)
5. जेसी ऍलिस्टर अँथोनी (रा. २०२ गणराज फोर रेसिडेन्सी, टाकळी, नागपुर)
6. कुणाल जितेश भावणे (रा. बाजारचौक-आंधळगाव, ता. मोहोळ, जि. भंडारा)
7. सिध्दांत सदार कांबळे (रा. रेड्डी इन क्लब मुंढवा, केशवनगर, हनुमान नगर, पुणे)

घटनेचा पुढील तपास पोलीस निरीक्षक संदेश केंजळे यांच्या मार्गदर्शनाखाली सुरू आहे.

परिसरात वाढत असलेल्या धर्मांतराच्या प्रकारांबद्दल चिंता

बजरंग दलाच्या कार्यकर्त्यांनी शिरूर परिसरात धर्मांतरासाठी नागरिकांवर आमिष आणि दबाव टाकला जात असल्याचा आरोप केला आहे. त्यांच्या मते, ठराविक धर्मात येण्यासाठी काही मंडळी गावागावात फिरत आहेत.

"शिरूर परिसरामध्ये वारंवार धर्म परिवर्तनासाठी दबाव आणला जात आहे. मात्र पोलिसांकडून याबाबत योग्य कारवाई केली जात नाही. वेळीच कारवाई होत नसल्यामुळे धर्म परिवर्तनासाठी फिरणाऱ्या लोकांचे फावले आहे," असा आरोप बजरंग दलाच्या वतीने करण्यात आला आहे.

आमदार लांडगे यांची प्रतिक्रिया

"धर्म परिवर्तन करण्यासाठी नागरिकांवर दबाव आणणे, त्यासाठी गावागावात फिरणे, हिंदू देवदेवतांचा अपमान करणे, अवमानकारक भाषा वापरणे हे सर्व प्रकार जाणीवपूर्वक केले जात आहेत. अशा प्रकाराबाबत तक्रार आल्यानंतर पोलिसांनी याबाबत कडक कारवाई तात्काळ करणे अपेक्षित आहे. वेळीच असे प्रकार रोखले नाही तर समाजातील अनुचित घटना वाढत जातील. राज्य सरकारनेही या प्रकारांची दखल घेतली आहे," असे आमदार महेश लांडगे यांनी सांगितले.

......................................

 #ShirurNews 

#ReligiousConversion 

#MaheshLandge 

#PunePolice 

#AntiConversionLaw 

#TakliHaji 

#HinduDeitiesInsult 

#ChristianMissionaries