उरण नगरपरिषदेच्या कंत्राटी सफाई कामगारांचे आमरण उपोषण स्थगित

 

उरण, दि.१४ मे २०२५ (प्रतिनिधी) : उरण नगरपरिषदेच्या घनकचरा विभागातील कंत्राटी कामगारांनी सुरू केलेले आमरण उपोषण तुर्त स्थगित करण्यात आले आहे. उप जिल्हाधिकारी रविंद्र शेळके, सहाय्यक पोलिस आयुक्त विशाल नेहूल आणि वरिष्ठ पोलिस निरीक्षक जितेंद्र मिसाळ यांनी मुख्याधिकारी समीर जाधव व कॉन्ट्रॅक्टर यांच्याशी समन्वय साधून मार्ग काढल्यामुळे हा निर्णय घेण्यात आला.

१३ मे २०२५ पासून सुरू झालेले हे आमरण उपोषण उरण नगर परिषद प्रशासनाने प्रलंबित निविदा प्रक्रियेसंदर्भात कराराची पुढील प्रक्रिया पूर्ण करण्यासाठीचे पत्र नवीन ठेकेदार कंपनीला दिल्यामुळे स्थगित करण्यात आले आहे. वरिष्ठ पोलीस निरीक्षक जितेंद्र मिसाळ यांच्या सूचनेनुसार हे आंदोलन तात्पुरते स्थगित करण्यात आले असून, १९ मे २०२५ पर्यंत प्रश्न सुटावा अशी अपेक्षा व्यक्त करण्यात आली आहे.

उल्लेखनीय म्हणजे ठेकेदार मे. भाग्यदिप वेस्ट मॅनेजमेंट यांनी ३ मे २०२५ पासून कंत्राटी कामगारांना बेकायदेशीरपणे कामावरून कमी केले होते. त्याविरोधात म्युनिसिपल एम्प्लॉइज युनियनचे पदाधिकारी अध्यक्ष ॲड. सुरेश ठाकूर, कार्याध्यक्ष संतोष पवार, सरचिटणीस अनिल जाधव यांच्या नेतृत्वाखाली आंदोलन सुरू करण्यात आले होते.

चर्चेदरम्यान कोविड कालावधीत जीवाची पर्वा न करता काम केलेल्या या कंत्राटी सफाई कामगारांना न्याय देण्याच्या मागणीला प्रशासनाने सकारात्मक प्रतिसाद दिला. नगरपरिषद प्रशासनाने नवीन ठेकेदार कंपनीला तीन महिन्यांपासून प्रलंबित असलेले पत्र पुढील करार पूर्तीकरीता दिले असल्याने चार दिवसांत प्रश्न निकालात निघण्याची शक्यता आहे.

देशातील युद्धजन्य परिस्थिती विचारात घेऊन पोलिस प्रशासनाच्या सूचनेनुसार १९ मे २०२५ पर्यंत आंदोलन स्थगित करण्यात आले आहे. त्याचप्रमाणे १६ मे २०२५ रोजी नगरपरिषद कार्यालयावर काढण्यात येणारा मोर्चाही तूर्त स्थगित करण्यात आला आहे. मात्र १९ मे पर्यंत समस्या सुटली नाही तर २० मे पासून आमरण उपोषण पुन्हा सुरू होणार असून, २२ मे रोजी नगरपरिषदेवर मोर्चा काढण्यात येणार असल्याचे युनियनच्या पदाधिकाऱ्यांनी स्पष्ट केले आहे.

अत्यंत अल्प वेतनावर काम करणाऱ्या दलित, आदिवासी व गरीब कंत्राटी सफाई कामगारांच्या आंदोलनाला पाठिंबा देण्यासाठी प्रा. तथा ॲड. राजेंद्र मढवी, उरण उत्कर्ष समितीचे अध्यक्ष गोपाळ पाटील, म्युनिसिपल एम्प्लॉइज युनियनच्या उरण युनिटचे कार्याध्यक्ष मधुकर भोईर, सामाजिक कार्यकर्त्या सिमाताई घरत, वंदना पवार, माजी नगराध्यक्ष परमानंद करंगुटकर, पत्रकार जगदीश तांडेल, मधुकर ठाकूर, प्रवीण पुरो, शेखर पाटील आणि सामाजिक कार्यकर्ते मनिष कातकरी व सचिन वर्तक यांनी भेट दिली होती.

----------------------------------------------

#UranMunicipalCouncil 

#ContractWorkers 

#LaborRights 

#HungerStrike 

#SanitationWorkers 

#MaharashtraNews 

#LaborUnion 

#WorkersProtest 

#MunicipalEmployees 

#DalitRights