स्वच्छ सर्वेक्षण २०२५-२६ मध्ये अव्वल येण्यासाठी सर्वांनी एकत्रितपणे प्रयत्न करणे आवश्यक : उपमुख्यमंत्री अजित पवार

पिंपरी चिंचवड शहराला ‘स्वच्छ, हरित आणि समृद्ध’ शहर बनवण्याचे उद्दिष्ट

स्वच्छतेच्या कामात नागरिकांचे सहकार्य महत्त्वाचे; राज्य सरकारकडून मदतीची ग्वाही

महापालिका प्रशासनाच्या विविध प्रकल्पांचा प्रारंभ व गौरव सोहळा

पिंपरी, २३ ऑगस्ट २०२५, (प्रतिनिधी): पिंपरी चिंचवड शहराला स्वच्छ सर्वेक्षण २०२५-२६ मध्ये देशात अव्वल स्थान मिळवण्यासाठी महापालिकेसोबत लोकप्रतिनिधी, नागरिक, आणि स्वयंसेवी संस्था अशा सर्वांनी एकत्रितपणे काम करणे आवश्यक आहे, असे प्रतिपादन महाराष्ट्राचे उपमुख्यमंत्री तथा पुणे जिल्ह्याचे पालकमंत्री अजित पवार यांनी केले. यासाठी राज्य सरकारकडून आवश्यक ती सर्व मदत देण्याची ग्वाहीही त्यांनी दिली.

भारत सरकारच्या स्वच्छ भारत अभियानांतर्गत झालेल्या स्वच्छ सर्वेक्षण २०२४-२५ मध्ये पिंपरी चिंचवड शहराने देशात सातवे तर राज्यात प्रथम स्थान मिळवले होते. या यशात योगदान देणाऱ्या व्यक्तींचा सन्मान आणि स्वच्छ सर्वेक्षण २०२५-२६ च्या पूर्वतयारीचा प्रारंभ आज पिंपरी येथे उपमुख्यमंत्री अजित पवार यांच्या हस्ते झाला. यावेळी त्यांनी आर.आर.आर. सेंटर डॅशबोर्ड प्रणाली, शून्य कचरा प्रकल्प डॅशबोर्ड प्रणाली, स्वच्छ शौचालय ॲप, तसेच स्वच्छता सर्वेक्षण २०२५-२६ च्या मॅस्कॉट व घोषवाक्याचे अनावरण केले.

उपमुख्यमंत्री अजित पवार म्हणाले की, पिंपरी चिंचवड शहराची ओळख औद्योगिक नगरी म्हणून असली तरी आता ती स्वच्छ, हरित आणि समृद्ध शहर म्हणून बनवायची आहे. शहरात दररोज १,४०० टन कचरा निर्माण होतो, त्यामुळे नागरिकांनी स्वच्छतेची सुरुवात स्वतःपासून करणे गरजेचे आहे. इंदोर शहराप्रमाणे पिंपरी चिंचवडच्या नागरिकांनीही प्रशासनाला सहकार्य केल्यास नक्कीच पहिल्या तीनमध्ये शहराचा क्रमांक येईल.

कार्यक्रमाला विधानसभा उपाध्यक्ष अण्णा बनसोडे, खासदार श्रीरंग आप्पा बारणे, आमदार उमा खापरे, पिंपरी चिंचवड महापालिका आयुक्त शेखर सिंह यांच्यासह अनेक लोकप्रतिनिधी आणि अधिकारी उपस्थित होते. यावेळी मागील वर्षीच्या सर्वेक्षणामध्ये उत्कृष्ट योगदान देणाऱ्या सफाई सेवक, अधिकारी, कर्मचारी आणि विविध संस्थांचा उपमुख्यमंत्र्यांच्या हस्ते सन्मान करण्यात आला. तसेच, स्वच्छतेविषयक घोषवाक्य आणि मॅस्कॉट स्पर्धेतील विजेत्यांनाही पारितोषिके प्रदान करण्यात आली. यावेळी जर्मनीतील एका प्रतिष्ठित महाविद्यालयात प्रवेश मिळालेल्या विद्यार्थिनी श्रावणी टोनगे हिचा विशेष सत्कारही करण्यात आला.