पिंपरी चिंचवड महापालिकेच्या स्थायी समिती बैठकीत शंभू सृष्टी आणि माता रमाई पुतळा उभारणीला मान्यता

 

अनेक प्रस्ताव मंजूर

पिंपरी, दि. ५ ऑगस्ट २०२५: पिंपरी चिंचवड शहराच्या विकासाला चालना देणाऱ्या अनेक महत्त्वाच्या प्रस्तावांना आज पार पडलेल्या महानगरपालिकेच्या स्थायी समिती बैठकीत प्रशासक शेखर सिंह यांनी मंजुरी दिली. शहराच्या मुख्य प्रशासकीय इमारतीमधील दिवंगत महापौर मधुकर पवळे सभागृहात ही बैठक संपन्न झाली. यावेळी सिंह यांनी केवळ प्रस्तावांना मान्यताच दिली नाही, तर शहरात सुरू असलेल्या विकासकामांचा विभागनिहाय सविस्तर आढावा देखील घेतला.

बैठकीत शहरातील अनेक महत्त्वाचे विषय चर्चेला आले आणि त्यांना मान्यता मिळाली. यामध्ये पिंपरी महानगरपालिका कार्यक्षेत्रातील संरक्षित मालमत्तांना करातील सवलत देण्याचा निर्णय घेण्यात आला. तसेच, वैद्यकीय विभागासाठी ११ महिन्यांच्या कालावधीसाठी कंत्राटी पद्धतीने ‘इंटेन्सव्हिस्ट’ संवर्गातील पदे भरण्यास मंजुरी देण्यात आली. यामुळे रुग्णालयातील सेवा अधिक प्रभावी होण्यास मदत होणार आहे. याशिवाय, महापालिकेच्या रुग्णालयांमध्ये कार्डियाक डोल्पर, २डी इको आणि थेडमिल टेस्ट (TMT) सेवा उपलब्ध करून देण्याचा महत्त्वपूर्ण निर्णय घेण्यात आला.

शहराच्या सांस्कृतिक आणि सामाजिक विकासालाही बैठकीत प्राधान्य देण्यात आले. यात धर्मवीर संभाजी महाराज यांच्या पुतळा परिसरात ‘शंभू सृष्टी’ उभारणे आणि पिंपरी चौक येथे माता रमाई यांचा पुतळा उभारणे या कामांसाठी वास्तुविशारदाची नेमणूक करण्यास मंजुरी देण्यात आली. तसेच, आर्थिक दुर्बल घटकांसाठी रावेत आणि डूडूळगाव येथे प्रधानमंत्री आवास योजनेअंतर्गत निवासी गाळे बांधण्याच्या प्रकल्पांनाही मान्यता मिळाली.

याशिवाय, विविध विकासकामांना मुदतवाढ, रस्त्यांचे सुशोभीकरण, क्रीडा संकुलातील सीसीटीव्ही यंत्रणेची दुरुस्ती, अग्निशमन आणि माध्यमिक विभागासाठी डेटा एंट्री ऑपरेटरची नियुक्ती, भामा आसखेड पाणीपुरवठा जलवाहिनी योजनेतील अडथळे दूर करणे, आणि शैक्षणिक साहित्यांची खरेदी यांसारख्या विविध लहान-मोठ्या खर्चांनाही प्रशासकांनी मान्यता दिली. बैठकीस अतिरिक्त आयुक्त विजयकुमार खोराटे, तृप्ती सांडभोर, नगरसचिव मुकेश कोळप यांच्यासह अनेक विभागप्रमुख व अधिकारी उपस्थित होते.

Pimpri Chinchwad Municipal Corporation, Standing Committee Meeting, Pune News, Development Projects, PCMC Administrator, Shekar Singh. 

#PCMC #PimpriChinchwad #StandingCommittee #UrbanDevelopment #ShekharSingh #PuneNews #Maharashtra #MunicipalCorporation