सनातन संस्थेकडून देशभरात ७७, पुणे जिल्ह्यात ७ ठिकाणी 'गुरुपौर्णिमा महोत्सव' (VIDEO)

 

राष्ट्र-धर्म रक्षणाचे कार्य करण्यासाठी गुरुपौर्णिमा महोत्सवात सहभागी होण्याचे आवाहन

पुणे, १० जुलै (प्रतिनिधी): हिंदु धर्मातील अद्वितीय गुरु-शिष्य परंपरेचा सन्मान करण्यासाठी आणि राष्ट्र-धर्म रक्षणाचे कर्तव्य अधोरेखित करण्यासाठी सनातन संस्थेच्या वतीने गुरुवार, १० जुलै २०२५ रोजी देशभरात विविध ठिकाणी 'गुरुपौर्णिमा महोत्सव' आयोजित करण्यात आला आहे. यंदा हा महोत्सव मराठी, हिंदी, गुजराती, तमिळ, तेलुगु, मल्याळम्, बंगाली आदी भाषांमध्ये देशभरात ७७ ठिकाणी, तर पुणे जिल्ह्यात ७ ठिकाणी होणार आहे.

सनातन संस्थेने आवाहन केले आहे की, गुरुपौर्णिमेच्या दिवशी गुरूंविषयी कृतज्ञता व्यक्त करण्याची परंपरा प्राचीन काळापासून चालत आली आहे. आजच्या धर्मयुद्धाच्या युगात अधर्माचे सावट पसरले असल्याने, धर्माच्या बाजूने उभे राहणे हाच साधनेचा आणि मुक्तीचा सर्वोच्च मार्ग आहे. ही जाणीव प्रत्येकापर्यंत पोहोचवण्यासाठी आणि धर्म-राष्ट्रासाठी कर्तव्यनिष्ठा जागवण्यासाठी या महोत्सवांचे आयोजन करण्यात आले आहे. आजही परमकल्याणकारी गुरुतत्त्व सनातन धर्माच्या रक्षणासाठी आणि भारताच्या उत्कर्षासाठी कार्यरत असल्याने गुरुपौर्णिमेचे आयोजन करण्यात आले आहे.

पुणे जिल्ह्यातील कार्यक्रम स्थळे (गुरुवार, १० जुलै २०२५):

1. सिद्धार्थ हॉल, फुल परी स्वीट मॉल शेजारील गल्लीमध्ये, माणिक बाग, सिंहगड रस्ता, पुणे. वेळ: सायं. ५.३० वाजता

2. विणकर सभागृह, सातारा रस्ता, ११/१ चव्हाण नगर कमानीच्या आत, पद्मावती, पुणे. वेळ: सायं. ६.०० वाजता

3. श्रुति मंगल कार्यालय, गो.ल. आपटे सभागृहासमोर, आपटे रोड, डेक्कन जिमखाना, पुणे. वेळ: सायं. ६.०० वाजता

4. रामबाग हॉल, सरकारी दवाखान्यासमोर, भोर, पुणे. वेळ: सायं. ६.०० वाजता

5. समीर बँक्वेट अँड लॉन्स, कात्रज-देहू रोड बायपास, रावेत, पुणे. वेळ: सायं. ६.०० वाजता

6. अपूर्वा गार्डन मंगल कार्यालय, वराळे रोड, तळेगाव, पुणे. वेळ: सायं. ६.०० वाजता

7. श्री तुळजाभवानी सभागृह, तिळवण तेली समाज कार्यालय, तेली बुधवार पेठ, जुन्नर, पुणे. वेळ: सायं ५ .०० वाजता

महोत्सवातील प्रमुख कार्यक्रम:

गुरुपौर्णिमा महोत्सवात श्री व्यासपूजन आणि प.पू. भक्तराज महाराज यांच्या प्रतिमापूजनासह (गुरुपूजन) 'सनातन राष्ट्र शंखनाद सोहळ्या'चा प्रेरणादायी व्हिडिओ दाखवण्यात येणार आहे. याशिवाय, रामराज्य स्थापनेसाठी संकल्प आणि सामूहिक नामजपयज्ञ आयोजित केला जाईल. समाज, राष्ट्र आणि धर्म या विषयांवर तज्ञांचे मार्गदर्शन, तसेच ‘राष्ट्र आणि धर्म यांच्या रक्षणासाठी साधना आणि युद्धकाळातील कर्तव्ये’ या विषयांवर मान्यवर वक्त्यांचे मार्गदर्शन होणार आहे. महोत्सवस्थळी धर्म, अध्यात्म, साधना, बालसंस्कार, आचारधर्म, आयुर्वेद, प्रथमोपचार, स्वसंरक्षण, हिंदु राष्ट्र आदी विषयांवरील ग्रंथप्रदर्शन आणि राष्ट्र-धर्म विषयक फलक प्रदर्शनही लावण्यात येणार आहे.

ऑनलाईन गुरुपौर्णिमा महोत्सव: 

देश-विदेशांतील भाविकांना गुरुपौर्णिमेचा लाभ घेता यावा यासाठी सनातन संस्थेच्या वतीने मराठी, हिंदी, गुजराती, तमिळ व मल्याळम् भाषांमध्ये ऑनलाईन गुरुपौर्णिमा महोत्सवांचे आयोजन करण्यात आले आहे. १० जुलै रोजी सायंकाळी ६.०० वाजता मराठी भाषेतील महोत्सवाचा लाभ Sanatan.org/mr/gurupurnima या लिंकवरून घेता येईल.

सनातन संस्थेने सर्व राष्ट्र आणि धर्मप्रेमी हिंदूंना सहकुटुंब या अमूल्य पर्वणीचा लाभ घेण्याचे आवाहन केले आहे. धर्म, राष्ट्र आणि आध्यात्मिक उन्नतीसाठी गुरुकृपेकडे वळा आणि गुरुपौर्णिमा महोत्सवात सहभागी व्हा, असे आवाहन प्रा. विठ्ठल जाधव, सनातन संस्था, पुणे यांनी केले आहे.