पिंपरी, दि. ३ जुलै २०२५: डेंग्यू आणि मलेरियासारख्या आजारांचा प्रादुर्भाव रोखण्यासाठी पिंपरी चिंचवड महानगरपालिकेच्या आरोग्य विभागाने डास निर्मूलनाच्या उपाययोजना अधिक तीव्र केल्या आहेत. महापालिका आयुक्त तथा प्रशासक शेखर सिंह, अतिरिक्त आयुक्त विजयकुमार खोराटे आणि उप आयुक्त सचिन पवार यांच्या मार्गदर्शनाखाली ही व्यापक मोहीम राबवण्यात येत आहे. औषध फवारणीसह घरांची व कंटेनर तपासणी, भंगार दुकाने आणि बांधकामस्थळांची पाहणी यावर भर दिला जात आहे. यासोबतच, जनजागृती आणि दंडात्मक कारवाईलाही गती देण्यात आली आहे.
आठ क्षेत्रीय कार्यालयांमार्फत व्यापक कारवाई
महानगरपालिकेच्या आठही क्षेत्रीय कार्यालयांमार्फत समन्वय साधून ही कारवाई करण्यात आली आहे.
घरांची तपासणी: एकूण २ लाख ७० हजार ८८५ घरांची तपासणी करण्यात आली असून, त्यापैकी ५ हजार १७२ घरांच्या परिसरात डास उत्पत्तीसाठी पोषक वातावरण असल्याचे आढळून आले.
कंटेनर तपासणी: १४ लाख ४६ हजार ४५३ कंटेनरपैकी ५ हजार ६४१ कंटेनरमध्ये डास उत्पत्तीसाठी पोषक वातावरण असल्याचे निदर्शनास आले.
भंगार दुकाने: ७१७ भंगार दुकानांची तपासणी करण्यात आली.
बांधकाम स्थळे: ९८० बांधकाम स्थळांची तपासणी करून त्यामध्ये अस्वच्छता व पाणी साचल्याचे आढळले.
नोटीस व दंड: २ हजार १९६ ठिकाणी नोटीस बजावण्यात आल्या असून २५२ नागरिक व आस्थापनांवर थेट दंडात्मक कारवाई करत ७ लाख इतकी दंडाची रक्कम वसूल करण्यात आली.
डेंग्यू प्रतिबंधासाठी विविध जनजागृती उपक्रम
आरोग्य विभागाकडून डेंग्यू प्रतिबंधासाठी विविध जनजागृती उपक्रम राबवले जात आहेत:
नियमित औषध फवारणी
घरोघरी माहितीपत्रकांचे वितरण
शाळांमध्ये विद्यार्थ्यांसाठी जनजागृती प्रशिक्षण
प्रभागस्तरावर विशेष जनजागृती कार्यक्रम
सार्वजनिक ठिकाणी स्वच्छता मोहिमा
नागरिकांना सहकार्याचं आवाहन
शेखर सिंह, आयुक्त तथा प्रशासक, पिंपरी चिंचवड महानगरपालिका यांनी नागरिकांना या मोहिमेत सहकार्य करण्याचे आवाहन केले आहे. ते म्हणाले, "पिंपरी चिंचवड महानगरपालिकेकडून डेंग्यू मलेरियाचा नायनाट करण्यासाठी जनजागृती करण्याबरोबरच, डासांची उत्पत्ती रोखण्यासाठी औषध फवारणी, तपासण्या आणि आवश्यक त्या सर्व उपाययोजना करण्यात येत आहेत. नागरिकांनी या उपक्रमात सहकार्य करून आपल्या परिसरातील स्वच्छता राखून या व्यापक मोहिमेस सहकार्य करावे."
याचबरोबर, सचिन पवार, उप आयुक्त, आरोग्य विभाग, पिंपरी चिंचवड महानगरपालिका यांनीही नागरिकांना स्वच्छता राखण्याचं आणि आठवड्यातून एक दिवस 'कोरडा दिवस' म्हणून पाळण्याचं आवाहन केलं. "डेंग्यू आणि मलेरियाचा प्रसार रोखण्यासाठी अतिरिक्त आयुक्त विजयकुमार खोराटे यांच्या मार्गदर्शनाखाली आरोग्य विभागाकडून सर्व स्तरांतून उपाययोजना केल्या जात असून, नागरिकांनी देखील स्वच्छता राखावी तसेच आठवड्यातून एक दिवस हा कोरडा दिवस म्हणून पाळावा," असे ते म्हणाले.
Pimpri Chinchwad, PMC, Dengue, Malaria, Mosquito Control, Public Health, Sanitation Drive, Fines, Health Department
#PimpriChinchwad #Dengue #Malaria #MosquitoControl #PMC #PublicHealth #CleanlinessDrive #HealthAwareness
Reviewed by ANN news network
on
७/०३/२०२५ ०८:१७:०० PM
Rating:
कोणत्याही टिप्पण्‍या नाहीत: