टीपी-लिंक इंडियाचा भारतात मोठा विस्तार; मंत्री मंगल प्रभात लोढा यांच्या हस्ते मुंबईतील केंद्राचे उद्घाटन

 

पुढील वर्षात २० नवीन सेवा केंद्रे आणि कर्मचाऱ्यांची संख्या ३० टक्क्यांनी वाढवणार

मुंबई, १० जुलै २०२५: जागतिक स्तरावर वाय-फाय उपकरणे आणि कनेक्टिव्हिटी सोल्यूशन्समध्ये आघाडीची कंपनी असलेल्या टीपी-लिंक इंडियाने आज भारतात आपल्या महत्त्वपूर्ण विस्ताराची घोषणा केली आहे. कंपनीने मुंबईतील त्यांच्या नवीन मुख्यालयाच्या जवळच देशातील पहिले इनक्यूबेशन सेंटर सुरू केले असून, महाराष्ट्राचे कौशल्य विकास आणि उद्योजकता मंत्री श्री. मंगल प्रभात लोढा यांच्या हस्ते त्याचे उद्घाटन करण्यात आले.

या नवीन इनक्यूबेशन सेंटरचा उद्देश नावीन्यपूर्णतेला चालना देणे, भागीदारांना प्रशिक्षण देणे आणि एंटरप्राइझ सोल्यूशन्सचे प्रात्यक्षिक दाखवणे हा आहे. हे केंद्र २०,००० चौरस फूट क्षेत्रफळावर पसरलेले असून, येथे सध्या १५० पेक्षा जास्त आसन क्षमता आहे. तरुणांच्या प्रतिभेला प्रोत्साहन देण्यासाठी आणि पुढच्या पिढीतील कनेक्टिव्हिटी तंत्रज्ञानामध्ये नवोपक्रमांना चालना देणे हा या केंद्राचा मुख्य हेतू आहे.

भारतातील त्यांच्या भारत-प्रथम दृष्टिकोनाला आणखी मजबूत करत, टीपी-लिंक लवकरच (येत्या काही आठवड्यांत) बेंगळुरूमध्ये संशोधन आणि विकासासाठी एक अत्याधुनिक ग्लोबल कॅपॅबिलिटी सेंटर (GCC) देखील सुरू करणार आहे. हे जीसीसी फर्मवेअर डेव्हलपमेंट, एआय/एमएल ऍप्लिकेशन्स आणि प्रगत नेटवर्किंग सोल्यूशन्स (यात त्यांचा एंटरप्राइझ सोल्यूशन्स ब्रँड, ओमाडाचाही समावेश आहे) यांवर लक्ष केंद्रित करेल.

विस्तार योजना आणि रोजगार निर्मिती: भारत केंद्रित विकास योजनेचा एक भाग म्हणून, टीपी-लिंकचे पुढील वर्षभरात आणखी २० सेवा केंद्रे स्थापन करण्याचे उद्दिष्ट आहे. यामुळे विशेषतः टिअर २ आणि टिअर ३ शहरांमध्ये कंपनीचे सेवा केंद्र नेटवर्क वाढेल आणि टीपी-लिंक इंडिया देशभरातील विक्री-पश्चात पायाभूत सुविधांच्या बाबतीत सर्वात मोठ्या कंपन्यांमध्ये स्थान मिळवेल. वाढत्या ऑपरेशन्स आणि नावीन्यपूर्ण उपक्रमांना पाठबळ देण्यासाठी टीपी-लिंक इंडिया पुढील वर्षी त्यांच्या कर्मचाऱ्यांची संख्या ३० टक्क्यांनी वाढवण्याच्या विचारात आहे. सध्या कंपनीची भारतात १० शहरांमध्ये कार्यालये आहेत.

अधिकारी वर्गाची प्रतिक्रिया: महाराष्ट्र सरकारचे कौशल्य विकास आणि उद्योजकता मंत्री श्री. मंगल प्रभात लोढा म्हणाले, "मुंबईतील नवीन मुख्यालयात विद्यार्थ्यांसाठी इनक्यूबेशन सेंटर लाँच करून टीपी-लिंक इंडिया संशोधन संस्कृतीला प्रोत्साहन देत आहे हे पाहून खूप आनंद झाला. विद्यार्थ्यांना या इनक्यूबेशन सेंटरचा फायदा होईल आणि खऱ्या अर्थाने डिजिटल भारत निर्माण करण्यास मदत होईल, अशी आम्हाला आशा आहे."

टीपी-लिंक इंडियाचे सीईओ आणि व्यवस्थापकीय संचालक संजय सहगल यांनी सांगितले, "भावी पिढीला सक्षम बनवणे ही शाश्वत विकास आणि सामाजिक प्रगतीची गुरुकिल्ली आहे, यावर आमचा विश्वास आहे. या केंद्रात गुंतवणूक करून, आम्ही सर्जनशीलता, सहकार्य आणि धाडसी विचारपूर्वक चालणाऱ्या भविष्यात गुंतवणूक करत आहोत. हे नवीन केंद्र केवळ एक जागा नाही, तर ते नवनवीन, अनोख्या कल्पनांचे लाँचपॅड आहे." त्यांनी स्टार्टअप्स, शैक्षणिक संस्था आणि उद्योग भागीदारांना या नवोपक्रमाच्या प्रवासात सहभागी होण्यासाठी आमंत्रित केले.