शिवरायांचे विचार बाबासाहेबांनी संविधानात उतरविले - किरण माने

 

पिंपरी, ९ मे २०२५: "छत्रपती शिवाजी महाराजांचे विचार संविधानाच्या माध्यमातून भारतरत्न डॉ. बाबासाहेब आंबेडकर यांनी प्रत्यक्षात आणले!" असे महत्त्वपूर्ण प्रतिपादन सुप्रसिद्ध अभिनेते किरण माने यांनी गुरुवारी केले. श्री दत्त मंदिर चौक, मोहननगर, चिंचवड येथे 'शिव - फुले - शाहू - आंबेडकर - लोकमान्य व्याख्यानमाले'च्या दुसऱ्या पुष्पात ते 'शिवराय ते भीमराय' या विषयावर व्याख्यान देत होते.

व्याख्यानमालेसाठी पिंपरी-चिंचवड व्याख्यानमाला समन्वय समितीचे अध्यक्ष राजाभाऊ गोलांडे, संदीपान गायकवाड, शिवलिंग ढवळेश्वर, प्रताप गुरव, अनिल सूर्यवंशी, गणेश लंगोटे आणि मुख्य संयोजक मारुती भापकर उपस्थित होते. ज्येष्ठ सामाजिक कार्यकर्ते मानव कांबळे यांनी कार्यक्रमाचे अध्यक्षपद भूषविले.

ब्राह्मण्यवादी लेखकांनी बदलला इतिहास

प्रभावी वक्तृत्वशैलीत बोलताना किरण माने म्हणाले, "ब्राह्मण्यवादी लेखकांनी इतिहासाची रचना बदलून टाकली आहे. त्यामुळे खरा इतिहास लोकांपर्यंत कधीच पोहोचला नाही. छत्रपती शिवरायांना 'गोब्राह्मण प्रतिपालक' हे बिरुद लावण्यात आले, ते पूर्णतः चुकीचे आहे. वास्तविक, शिवरायांनी ब्राह्मणांसहित अठरापगड जातींचे निष्ठापूर्वक रक्षण केले."

माने पुढे म्हणाले, "आजकाल काही निष्ठावान इतिहासकारांनी खरे शिवराय शोधून काढले आहेत. ज्या इतिहासाचे वर्तमानकाळाशी नाते जोडता येते, तोच खरा इतिहास असतो. शिवरायांची खरी महानता त्यांच्या लढायांतील पराक्रमापेक्षाही त्यांच्या रयतेसाठी केलेल्या कल्याणकारी कार्यात आहे."

संत तुकारामांचा प्रभाव शिवराय आणि भीमरायांवर

किरण माने यांनी महत्त्वाचा मुद्दा मांडताना सांगितले की छत्रपती शिवाजी महाराज आणि डॉ. बाबासाहेब आंबेडकर या दोघांवरही संत तुकाराम महाराजांचा मोठा प्रभाव होता. "बाबासाहेबांच्या 'मूकनायक' या वृत्तपत्रावर तुकारामांचा अभंग नेहमी उद्धृत केलेला असे. संविधानाची मांडणी करताना माझ्या मनात संत तुकारामांचे अभंग होते, असे स्वतः बाबासाहेबांनी सांगितले आहे," असे ते म्हणाले.

छत्रपतींचे अनुयायी आणि बाबासाहेबांचे अनुयायी का वेगळे झाले?

व्याख्यानात एक महत्त्वाचा प्रश्न उपस्थित करताना माने म्हणाले, "छत्रपतींचे आणि बाबासाहेबांचे अनुयायी यांच्यात भिंत का निर्माण करण्यात आली? शिवशाहीचे रूपांतर पेशवाईत कसे झाले, हा अंतर्मुख करणारा प्रश्न आहे." त्यांनी बाबासाहेबांच्या 'क्रांती आणि प्रतिक्रांती' या पुस्तकात याचे सखोल विश्लेषण दिलेले असल्याचे सांगितले.

अणुहल्ल्यापेक्षा समाजात एकी गरजेची

अध्यक्षीय मनोगतात मानव कांबळे यांनी सद्यस्थितीवर भाष्य करताना सांगितले, "सामाजिक विषमता पुन्हा प्रस्थापित व्हावी यासाठी राजकीय व्यवस्थेकडून प्रयत्न केले जात आहेत. सरकारच्या विरोधात बोलले की तो देशद्रोह ठरतो. या पार्श्वभूमीवर संविधान नावाच्या तलवारीच्या साहाय्याने फुले-शाहू-आंबेडकरवादी कार्यकर्त्यांना लढावे लागेल!"

प्रास्ताविक करताना मुख्य संयोजक मारुती भापकर यांनी देशातील राजकीय परिस्थितीला विदारक संबोधून सद्यस्थितीत देशाच्या सैनिकांच्या पाठीशी असल्याचे सांगितले.

बाबासाहेबांचे कार्य एका जातीपुरते मर्यादित नाही

किरण माने यांनी समारोप करताना म्हणाले, "बाबासाहेब आंबेडकर यांनी सर्व समाजासाठी अथक कार्य केले असतानाही, एका विशिष्ट वर्चस्ववादी व्यवस्थेने त्यांना केवळ एका जातीपुरते मर्यादित करून टाकले आहे." त्यांनी शिवराय आणि भीमराय यांच्या अनुयायांना हेवेदावे बाजूला ठेवून एकत्र येण्याचे आवाहन केले.

व्याख्यानमालेच्या यशस्वी आयोजनासाठी दिगंबर बालुरे, नकुल भोईर, महादू नल्लेकर, राम नलावडे, महेश पाटील आणि सखाराम वलवणकर यांचे सहकार्य लाभले. कार्यक्रमाचे सूत्रसंचालन राहुल शिंपले यांनी केले, तर प्रकाश जाधव यांनी आभार मानले.

.....................................

# AmbedkariteMovement