पिंपरी चिंचवडमध्ये पर्जन्यमान व पूरपूर्वसूचना प्रणाली कार्यान्वित

 

तंत्रज्ञानाच्या आधारे शहर सुरक्षिततेकडे महापालिकेचा वाटचाल

पिंपरी  – पिंपरी चिंचवड महानगरपालिका (PCMC) आणि सेंटर फॉर डेव्हलपमेंट ऑफ अॅडव्हान्स्ड कम्प्युटिंग (C-DAC), पुणे यांच्या संयुक्त सहकार्याने "पर्जन्यमान व पूरपूर्वसूचना प्रणाली" कार्यान्वित करण्यात आली आहे. हवामान, पूर व वायू प्रदूषण यांसारख्या आपत्तीजन्य घटनांबाबत वेळेवर सूचना देऊन शहर सुरक्षित ठेवणे हा या उपक्रमाचा उद्देश आहे.

ही प्रणाली भारत सरकारच्या इलेक्ट्रॉनिक्स व माहिती तंत्रज्ञान मंत्रालयाच्या राष्ट्रीय सुपरकॉम्प्युटिंग मिशन (NSM) अंतर्गत विकसित करण्यात आली आहे. C-DAC, पुणे येथील उच्च कार्यक्षमता संगणन (HPC) गटाने भारतीय शहरी भागांत निर्माण होणाऱ्या पर्यावरणीय समस्यांचा सखोल अभ्यास करून या प्रणालीची रचना केली आहे.

प्रगत सिम्युलेशन लॅबद्वारे भविष्याचा वेध

या उपक्रमाअंतर्गत हवामान, जलव्यवस्थापन, आरोग्य, वाहतूक अशा विविध क्षेत्रांचा परस्पर संबंध तपासण्यासाठी मल्टि-सेक्टोरियल सिम्युलेशन लॅब स्थापन करण्यात आली आहे. आभासी प्रयोगांद्वारे या घटकांचे परिणाम मोजता येतात आणि धोरणात्मक निर्णयप्रक्रियेत गती येते.

प्रणालीची ठळक वैशिष्ट्ये

• उच्च कार्यक्षम संगणनावर आधारित प्रणाली
  शहराच्या वॉर्ड, गाव व तहसील पातळीवर हवामान, जलविज्ञान आणि वायू गुणवत्ता यांचे सखोल मॉडेलिंग केले गेले आहे. पावसाचे प्रमाण, पूरस्थिती, उष्णतेच्या/थंडीच्या लाटा आणि वायू प्रदूषण यांचा ७२ तासांपूर्वी अचूक अंदाज देता येतो.

• स्वयंचलित पडताळणी व मूल्यांकन
  प्रणालीतील भाकितांची अचूकता तपासण्यासाठी प्रत्यक्ष निरीक्षण केलेल्या आकडेवारीशी तुलना करणारी यंत्रणा विकसित करण्यात आली आहे.

• GIS आधारित निर्णय सहाय्यक प्रणाली (DSS)
  धोरणकर्त्यांना उपयोगी ठरणारे अलर्ट्स, डेटा विश्लेषण, दृश्यांकन आणि परस्परसंवादी माहिती एकाच मंचावर उपलब्ध आहे.

• स्थानिक निर्णयक्षमतेत वाढ
  शहर व गाव पातळीवर प्राप्त निरीक्षणांवर आधारित निर्णय प्रशासनास घेता येतात, जे आपत्ती निवारण अधिक प्रभावी बनवतात.

नागरिकांच्या सुरक्षेसाठी महत्त्वाचे पाऊल

या प्रणालीमुळे नागरिकांना हवामानाशी संबंधित आपत्तीजनक स्थितीबाबत वेळेवर माहिती मिळणार असून आपत्ती व्यवस्थापन अधिक सक्षम होणार आहे.

आयुक्तांचा दृष्टिकोन

"आपत्तीपूर्व तयारी ही सुरक्षित शहराच्या बांधणीसाठी अत्यावश्यक आहे. C-DACच्या सहकार्याने विकसित केलेली प्रगत हवामान व पूरपूर्वसूचना प्रणाली पिंपरी चिंचवड शहराला अधिक सक्षम, जागरूक आणि आपत्ती निवारणास सज्ज बनवेल. या प्रणालीच्या मदतीने धोरणनिर्मितीपासून नागरिकांच्या सुरक्षेपर्यंत प्रत्येक टप्प्यावर परिणामकारक निर्णय घेता येणार आहेत."
– शेखर सिंह, आयुक्त तथा प्रशासक, पिंपरी चिंचवड महानगरपालिका

................................................

#PCMC
#CDACPune
#EarlyWarningSystem
#UrbanFloods
#SmartCityIndia
#DisasterManagement
#WeatherForecast
#AirQuality
#AdvancedTechnology
#UrbanPlanning