पिंपरी मतदारसंघात महायुतीची ताकद एकवटली

 

"युतीधर्म पाळण्यास सर्व मित्रपक्ष तयार" - योगेश बहल

पिंपरी : महायुतीचा धर्म पाळण्यासाठी सर्व मित्रपक्ष सज्ज असून, पिंपरी विधानसभा मतदारसंघातून अपक्ष म्हणून उभे राहिलेल्या अनेक उमेदवारांनी महायुतीचे उमेदवार आमदार अण्णा बनसोडे यांच्या पाठिंबार्थ माघार घेतली आहे. राष्ट्रवादी काँग्रेस (अजित पवार गट) चे शहराध्यक्ष योगेश बहल यांनी ही माहिती दिली.

चिंचवड येथे झालेल्या पत्रकार परिषदेत आरपीआय आठवले गटाच्या चंद्रकांता सोनकांबळे यांनी केंद्रीय मंत्री रामदास आठवले यांच्या सूचनेनुसार उमेदवारी मागे घेतली. उपमुख्यमंत्री अजित पवार यांनी सोनकांबळे यांना भविष्यात महामंडळ किंवा शासकीय पद देण्याचे आश्वासन दिले आहे.

आरपीआय नेते परशुराम वाडेकर यांनी सांगितले की, पक्षाने १२ जागांची मागणी केली होती. २०१४ मध्ये सोनकांबळे यांना ४७ हजार मते मिळाली होती. मात्र आता युतीधर्म पाळत सर्वजण एकत्र काम करणार आहेत.

आमदार अण्णा बनसोडे यांनी सर्व घटक पक्षांना विश्वासात घेऊन प्रचार करण्याचे आश्वासन दिले. शिवसेनेचे जितेंद्र ननावरे, राष्ट्रवादीचे काळूराम पवार यांनीही महायुतीच्या विजयासाठी माघार घेतली आहे.

बैठकीला भाजपचे समन्वयक सदाशिव खाडे, महिला आघाडीच्या शहराध्यक्ष कविता आल्हाट, माजी विरोधी पक्षनेते संतोष बारणे यांच्यासह अनेक पदाधिकारी उपस्थित होते. उद्या मंगळवारी रागा पॅलेस येथे महायुतीची महत्त्वाची बैठक होणार असल्याचेही बहल यांनी सांगितले.