नवसाला पावणाऱ्या बाप्पा चरणी तब्बल 146 किलो वजनाचे पेढे वाहून फेडला नवस...!

 

गणेश मिंड 

भिगवण : सध्या गणेशोत्सव चालू आहे आणि संपूर्ण देशात उत्सव मोठ्या जल्लोषात उत्साहाने साजरा केला जातो.सर्वांचे दुःख हरपणारा नवसाला पावणारा गणपती बाप्पाची तशी ख्यातीच आहे. त्यामुळे या उत्सव काळात अनेक भक्तगण नवस बोलतात आणि अशाच एका आगळ्या वेगळ्या नवसाची हि चर्चा संपुर्ण तालुक्यात पसरली आहे...

इंदापूर तालुक्यातील भिगवण शेजारील पक्षी पर्यटकांसाठी प्रसिद्ध असलेल्या कुंभारगांव येथील  अशाच एका गणपती भक्ताने दिलेल्या आर्त हाकेला धावून आलेल्या गणपती बाप्पाची गोष्ट आहे, गावातील बाबासाहेब सल्ले हे गणपती देवाला खूप मानतात आणि मनोभावे श्रद्धेने गणपतीची पूजा करतात. अशातच गणपती उत्सव काळामध्ये त्यांच्या जवळचे नातेवाईक बालाजी धोंडीबा मल्लाव  व कमल भुजंग भोई  यांचा मागील दोन वर्षापुर्वी बारामती येथे अपघात झाला होता. या अपघातात त्या दोघांनाही गंभीर दुखापत झाली होती, यातून ते सुखरूप बरे व्हावे यासाठी नवसाला पावणारा गणपती म्हणून कुंभारगांव येथील क्रांती मित्र मंडळ यांनी स्थापन केलेल्या गणपती देवाला त्यांनी नवस केला होता. बालाजी मल्लाव यांचे दाजी श्री बाबासाहेब विलास सल्ले यांनी गणपती चरणी प्रार्थना केली होती की, दोघांनाही जीवनदान भेटू दे त्यांच्या दोघांच्या वजनाऐवढा पेढा तुझ्या चरणी वाहील ;आणि काही दिवसांनी ती प्रार्थना गणपती बाप्पांनी पूर्ण केली व दोघांनाही जीवनदान मिळाले म्हणून बाबासाहेब सल्ले यांनी शुक्रवार दिनांक २२.रोजी क्रांती मित्र मंडळ कुभांरगाव येथे तब्बल १४६ किलो वजनाच्या पेढ्यांचा नवस पूर्ण केला आहे.