"ट्रम्प यांच्या दबावापोटी देशात जबरदस्तीने 'E20' इंधन लादले; वाहनांचे इंजिन सीझ अन् २५ ते ३० टक्के मायलेज घटले!" : अरविंद केजरीवाल यांची केंद्र सरकारवर जोरदार टीका

पणजी / नवी दिल्ली: "केंद्र सरकारने देशातील सर्वसामान्य जनतेवर जबरदस्तीने 'E20' (२० टक्के इथेनॉल मिश्रित पेट्रोल) लादले आहे. यामुळे आज देशातील टू-व्हीलर, थ्री-व्हीलर आणि फोर-व्हीलर चालवणारे नागरिक प्रचंड त्रस्त झाले आहेत. E20 इंधनामुळे वाहनांचे मायलेज थेट २५ ते ३० टक्क्यांनी घटले आहे, गाड्यांचे इंजिन सीझ होत आहेत, फ्युएल सिस्टीम खराब होऊन साचणाऱ्या मॉयश्चरमुळे इंजिनला गंज लागत आहे. इतका प्रचंड आक्रोश असतानाही केंद्र सरकार हे घातक इंधन धोरण मागे घेण्यास तयार नाही," असा थेट आणि गंभीर आरोप आम आदमी पार्टीचे (AAP) राष्ट्रीय संयोजक अरविंद केजरीवाल यांनी पणजी येथील पत्रकार परिषदेत केला.

गोवा राज्यात घेतलेल्या या पत्रकार परिषदेत केजरीवाल यांनी ई-२० इंधनामुळे होणारे आर्थिक व तांत्रिक नुकसान, आंतरराष्ट्रीय दबाव आणि यामागील राजकीय कारणांवर सडेतोड भाष्य केले.

गोव्यातील ८५ ते ९० टक्के कुटुंबे ई-२० मुळे थेट प्रभावित

गोव्यातील परिस्थितीचे विश्लेषण करताना केजरीवाल म्हणाले, "देशभरात सरासरी ७ टक्के कुटुंबांकडे कार (फोर-व्हीलर) आहे, मात्र गोव्यात जवळपास ४५ टक्के कुटुंबांकडे चारचाकी वाहने आहेत. याशिवाय गोव्यात ८६ टक्के लोकांकडे दुचाकी (टू-व्हीलर) वाहने आहेत. म्हणजेच गोव्यातील ८५ ते ९० टक्के कुटुंबे या ई-२० इंधनाच्या निर्णयामुळे थेट प्रभावित झाली आहेत. आज नाही तर उद्या, ज्यांची वाहने अजून खराब झाली नाहीत, त्यांची इंजिने E20 मुळे सीझ होणारच आहेत."

जगातील इतर देशांचे उदाहरण देताना त्यांनी सांगितले की, "ज्या देशांनी इथेनॉलचा वापर सुरू केला, त्यांनी जनतेला व वाहन उद्योगाला १५ ते ५० वर्षांचा अवधी दिला. ब्राझीलने १९३१ मध्ये E5 ने सुरुवात केली आणि १९८५ मध्ये (तब्बल ५४ वर्षांनंतर) E20 आणले. आज तिथे E100 चालते, पण तरीही E30 आणि E100 मधील पर्याय उपलब्ध आहेत. अमेरिका किंवा जर्मनीसारख्या विकसित देशांत आज ५ ते १० टक्क्यांपेक्षा जास्त इथेनॉल मिश्रण वापरले जात नाही."

"परंतु, आपल्या देशात २०२२ मध्ये निर्णय घेऊन २०२५ मध्ये अवघ्या ३ वर्षांत जबरदस्तीने E20 लागू करण्यात आले. देशातील पेट्रोल पंपांचे स्टोरेज टँक यासाठी सक्षम नाहीत. टँकमध्ये साचणाऱ्या आर्द्रतेमुळे (Moisture) पेट्रोल आणि इथेनॉल वेगळे होऊन वाहनांच्या टाकीत पाणी जात आहे. ऑईल टँकर आणि वाहनांची इंजिन रचना बदलण्यापूर्वीच मोदी सरकारने हे इंधन जनतेच्या माथी मारले," असे केजरीवाल म्हणाले.

"ट्रम्प यांचा दबाव आणि अमेरिकेचे इथेनॉल भारतात डम्प"

इथेनॉल हे पेट्रोलपेक्षा महाग असल्याचे सांगताना केजरीवाल म्हणाले, "सध्या क्रूड ऑईल ५० रुपये प्रति लिटरच्या आसपास असताना इथेनॉल ७० रुपये प्रति लिटर मिळत आहे. तसेच इथेनॉलची कॅलरीफिक व्हॅल्यू (ऊर्जा क्षमता) कमी असल्याने ते कमी मायलेज देते. महाग आणि कमी मायलेज देणारे इंधन सरकार का लादत आहे? कारण अमेरिकेचे अध्यक्ष डोनाल्ड ट्रम्प यांचा मोदी सरकारवर प्रचंड दबाव आहे."

"अमेरिका हा जगातील सर्वात मोठा इथेनॉल उत्पादक देश आहे, पण तिथले नागरिक E20 वापरत नाहीत. त्यामुळे तिथल्या शेतकऱ्यांचा माल खपवण्यासाठी आणि अमेरिकन इथेनॉलसाठी भारतात मागणी निर्माण करण्यासाठी मोदी सरकारवर दबाव आणला गेला. गेल्या वर्षी भारताने अमेरिकेतून १ अब्ज लिटर इथेनॉल आयात केले, तर या वर्षी ५ अब्ज लिटर कचरा इथेनॉल आयात केले जात आहे," असा गंभीर आरोप त्यांनी केला.

या निर्णयाविरोधात ७ लाख लोकांनी ऑनलाईन टाऊनहॉल रॅलीत सहभाग घेतला असून, २ लाख नागरिकांच्या सह्यांची याचिका पंतप्रधान कार्यालयाकडे पाठवण्यात आल्याचे त्यांनी नमूद केले.

३० कोटी जुन्या वाहनांना धोका; नवीन गाड्या खरेदी न करण्याचे आवाहन

देशातील वाहनांच्या आकडेवारीवर बोलताना त्यांनी स्पष्ट केले की, "२०२३ नंतर बनलेली वाहने ई-२० सुसंगत (E20 Compliant) असू शकतात, पण त्यापूर्वीची देशातील ३० कोटी वाहने (२२ कोटी दुचाकी आणि ८ कोटी कार्स) ही केवळ E10 सुसंगत आहेत. या जुन्या वाहनांवर E20 लादले जात आहे. आता सरकार E30, E40 आणि E50 आणण्याची तयारी करत आहे."

या पार्श्वभूमीवर केजरीवाल यांनी जनतेला आवाहन केले की, "जोपर्यंत सरकार आपली धोरणे स्पष्ट करत नाही, तोपर्यंत नागरिकांनी नव्या पेट्रोल किंवा डिझेल गाड्या खरेदी करणे पूर्णपणे बंद करावे. जर नवी गाडी घ्यायचीच असेल तर केवळ इलेक्ट्रिक व्हेईकल (EV) खरेदी करावे."

"भाजप हटवा, गाडी वाचवा": राजकीय पर्यायावर भाष्य

गोव्यातील स्थानिक रिक्षाचालक, टॅक्सी चालक आणि पायलट (मोटारसायकल टॅक्सी) यांच्या पाठीशी 'आप' ठामपणे उभी राहील, असे सांगत केजरीवाल म्हणाले, "सरकारला अहंकार झाला आहे की जनता काहीही करू शकत नाही, आम्ही निवडणुका जिंकणारच. यावर एकच उपाय आहे - 'भाजप हटवा, गाडी वाचवा'. गोव्याच्या आगामी विधानसभा निवडणुकीत भाजपला पराभूत करा. निवडणुकीच्या निकालाच्या अवघ्या ५ दिवसांच्या आत केंद्र सरकारला संपूर्ण देशातून E20 मागे घ्यायला लावू, ही माझी गॅरंटी आहे."

काँग्रेसबाबत विचारलेल्या प्रश्नावर ते म्हणाले, "काँग्रेसला मत देऊन फायदा नाही, कारण काँग्रेसचे आमदार जिंकून आल्यावर पुन्हा भाजपमध्ये प्रवेश करतात. त्यामुळे भाजप हा मोठा धोका आहे, तर काँग्रेस हा अस्थिर पर्याय आहे." गोव्यात समविचारी पक्षांशी महाआघाडी (Alliance) करण्यासाठी आम आदमी पक्षाची ३ सदस्यांची समिती चर्चेसाठी तयार असल्याचेही त्यांनी शेवटी स्पष्ट केले.

• Labels: Arvind Kejriwal, AAP Press Conference, E20 Fuel Controversy, Goa Politics, Ethanol Blended Petrol, Narendra Modi, Donald Trump, Indian Automobile News

• Search Description: AAP Chief Arvind Kejriwal slams Modi govt over E20 fuel implementation, claiming US pressure, 25-30% mileage drop, and engine damages in 30 crore vehicles.

Hash Tags

#ArvindKejriwal #E20Fuel #E20Petrol #AAP #GoaPolitics #NarendraModi #AutomobileNews #BreakingNews #MaharashtraNews #IndiaNews