चैन स्नॅचिंग करणाऱ्या सराईत गुन्हेगाराला गुन्हेशाखेकडून अटक

 

मुंबई: मुंबई लोहमार्ग पोलीस आयुक्तालयाच्या हद्दीत चालत्या लोकल गाडीमध्ये प्रवाशांच्या गळ्यातील सोन्याची चैन जबरीने चोरी करणाऱ्या रेल्वे अभिलेखावरील एका २४ वर्षीय सराईत आरोपीला गुन्हे शाखा वांद्रे युनिट-०६ च्या पथकाने शिताफीने अटक केली आहे. शुभम बाबूलाल दिवाकर (वय २४ वर्षे, व्यवसाय-वाहन चालक, रा. गेट नं. १४, कृष्णा वाईशॉपच्या मागे, महालक्ष्मी, धोबीघाट सातरस्ता, मुंबई) असे अटक करण्यात आलेल्या आरोपीचे नाव आहे. पोलिसांनी आरोपीच्या मुसक्या आवळून त्याच्या ताब्यातून २,७०,००० रुपये किमतीची, १८ ग्रॅम वजनाची चोरी झालेली सोन्याची चैन हस्तगत केली आहे.

ही घटना ८ जून २०२६ रोजी रात्री २१:०५ वाजण्याच्या सुमारास मुंबई सेन्ट्रल रेल्वे पोलीस ठाण्याच्या हद्दीतील महालक्ष्मी रेल्वे स्थानकाच्या प्लॅटफॉर्म क्रमांक ०२ वर घडली होती. फिर्यादी चेतन रमेश भाटीया (वय ४६ वर्षे, धंदा-बिजनेस, रा. महावीर नगर, कांदिवली पश्चिम) हे बोरीवली स्लो लोकल गाडीमध्ये चढत असताना, ती गाडी थांबून सुरू होताच एका अनोळखी इसमाने मागून येऊन त्यांच्या गळ्यातील सोन्याची चैन हिसकावून पळ काढला होता. या संदर्भात ९ जून २०२६ रोजी मुंबई सेन्ट्रल रेल्वे पोलीस ठाण्यात गुन्हा रजि. नं. २३८/२०२६, कलम ३०४(२) BNS अन्वये जबरी चोरीचा गुन्हा दाखल करण्यात आला होता.

गुन्ह्याचे गांभीर्य ओळखून वांद्रे युनिट-०६ च्या तपास पथकाने घटनास्थळ व परिसरातील सीसीटीव्ही फुटेज अत्यंत बारकाईने तपासले. तांत्रिक विश्लेषणादरम्यान पोलीस हवालदार कुणाल तावडे, पोलीस शिपाई रुपेश पाटील आणि कुणाल वाल्डे यांना हा गुन्हा रेकॉर्डवरील आरोपी शुभम दिवाकर यानेच केल्याचे निष्पन्न झाले. त्यानुसार १० जून २०२६ रोजी मध्यरात्री ००:४५ वाजता त्याला महालक्ष्मी धोबीघाट परिसरातून ताब्यात घेऊन अटक करण्यात आली. पोलीस कोठडीदरम्यान आरोपीने पंचांसमक्ष गुन्हा कबूल करत आपल्या धोबीघाट येथील घरातून चोरीच्या सोन्याच्या चैनचे दोन तुकडे पोलिसांच्या स्वाधीन केले.

पोलीस अभिलेखानुसार, अटक करण्यात आलेला आरोपी शुभम दिवाकर हा अत्यंत अट्टल गुन्हेगार असून त्याच्यावर भायखळा पोलीस ठाण्यात ५, आग्रीपाडा येथे १, सीएसएमटी रेल्वे पोलीस ठाण्यात १ आणि कुर्ला रेल्वे पोलीस ठाण्यात १ असे एकूण ८ जबरी चोरी व चोरीचे गंभीर गुन्हे आधीच दाखल आहेत. 

ही यशस्वी कारवाई लोहमार्ग पोलीस आयुक्त श्री. एम. राकेश कलासागर आणि पोलीस उप आयुक्त (मध्य परिमंडळ) श्रीमती प्रज्ञा जेडगे यांच्या आदेशान्वये, सहाय्यक पोलीस आयुक्त श्री. राजेंद्र रानमाळे व वरिष्ठ पोलीस निरीक्षक श्री. विजय खेडकर यांच्या मार्गदर्शनाखाली सहाय्यक पोलीस निरीक्षक गणपत सुळे, आनंद जहागिरदार व अंमलदारांच्या पथकाने केली. या निमित्ताने लोहमार्ग पोलिसांनी सर्व रेल्वे प्रवाशांना प्रवासादरम्यान आपल्या मौल्यवान वस्तूंची काळजी घेण्याचे आवाहन केले आहे.

• Labels: Mumbai Railway Police, Train Chain Snatching, Crime Branch Arrest, Local Train Robbery, Mumbai Central Railway Police, Mahalakshmi Station.

• Search Description: Mumbai Railway Police Crime Branch Unit 6 arrested a record criminal Shubham Diwakar for snatching a gold chain worth Rs 2.70 Lakh from a passenger at Mahalakshmi railway station.

• Hashtags: #MumbaiLocal #RailwayPolice #ChainSnatching #CrimeBranch #MumbaiCentral #LocalTrainCrime #SecurityUpdate2026