ई-चलान विरोधात राज्यभरात आंदोलन, सरकारकडे जीआरची मागणी
पिंपरी, पुणे (दि. ३ जुलै २०२५): ई-चलानद्वारे होणाऱ्या दंडात्मक कारवाईला विरोध दर्शवण्यासाठी राज्यभरातील मालवाहतूकदारांनी मंगळवारी मध्यरात्रीपासून पुकारलेल्या बेमुदत चक्काजाम आंदोलनाची तीव्रता आज (गुरुवार) लक्षणीय वाढली आहे. मुंबईतील जवाहरलाल नेहरू पोर्ट ट्रस्ट (JNPT) येथे या आंदोलनाला १०० टक्के प्रतिसाद मिळाला असून, पुणे, पिंपरी-चिंचवड शहर आणि पुणे जिल्ह्यातील सुमारे ७५ टक्के वाहतूकदार व्यावसायिक या आंदोलनात सहभागी झाले आहेत. मालवाहतूकदारांनाही बस प्रवासी वाहतूकदारांप्रमाणे दिलासा देणारा जीआर (शासन निर्णय) सरकारने तातडीने काढावा, अशी मागणी असोसिएशन ऑफ ट्रान्सपोर्टर्स, पुणे या संघटनेने केली आहे.
राज्य सरकार चुकीच्या पद्धतीने "ई-चलान" द्वारे दंडात्मक कारवाई करून मालवाहतूकदारांना त्रास देत असल्याचा आरोप करत, याकडे सरकारचे लक्ष वेधण्यासाठी हे आंदोलन सुरू करण्यात आले आहे. असोसिएशन ऑफ ट्रान्सपोर्टर्स, पुणेचे अध्यक्ष दिलीप देशमुख यांनी प्रसिद्धीस दिलेल्या माहितीनुसार, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि परिवहन मंत्री प्रताप सरनाईक यांच्याकडे संघटनेच्या वतीने पाठपुरावा सुरू आहे.
गुरुवारी वाहतूक नगरी, निगडी येथे असोसिएशन ऑफ ट्रान्सपोर्टर्स, पुणे आणि पुणे बस प्रवासी वाहतूक संघटनेचे अध्यक्ष बाबा शिंदे यांच्या उपस्थितीत एक बैठक झाली. या बैठकीनंतर ई-चलान प्रणालीविरोधात जोरदार घोषणाबाजी करत निषेध नोंदवण्यात आला. याप्रसंगी कार्याध्यक्ष गौरव कदम, अनिल शर्मा, उपाध्यक्ष सुमित धुमाळ, सचिव अनुज जैन, खजिनदार विनोद जगजंपी यांच्यासह विविध संघटनांचे प्रतिनिधी उपस्थित होते.
असोसिएशन ऑफ ट्रान्सपोर्टर्स, पुणेचे कार्याध्यक्ष गौरव कदम यांनी, राज्य सरकारने मालवाहतूकदारांच्या ई-चलान संदर्भातील मागण्या आणि इतर प्रश्नांकडे गांभीर्याने लक्ष द्यावे आणि सकारात्मक निर्णय घ्यावा, अन्यथा बंदची तीव्रता आणखी वाढेल, असा इशारा दिला आहे.
या राज्यव्यापी बंदमध्ये राज्यातील सुमारे ३० वाहतूक संघटनांसह पुणे शहर, पिंपरी-चिंचवड आणि पुणे जिल्ह्यातील सर्व प्रवासी व मालवाहतूकदार व्यावसायिक स्वेच्छेने सहभागी झाले आहेत. यामध्ये महाराष्ट्र राज्य ट्रक टेम्पो टँकर्स बस वाहतूक महासंघ, महाराष्ट्र टेम्पो वेल्फेअर असोसिएशन, बॉम्बे गुड्स ट्रान्सपोर्ट असोसिएशन, ऑल इंडिया मोटर काँग्रेस, महाराष्ट्र नवनिर्माण वाहतूक सेना यांसारख्या प्रमुख संघटनांचा समावेश आहे. त्यामुळे या बंदची तीव्रता दिवसेंदिवस वाढत असल्याचे उपाध्यक्ष सुमित धुमाळ आणि सचिव अनुज जैन यांनी सांगितले.
प्रवाशांना दिलासा, मग आम्हाला का नाही? विशेष म्हणजे, ऑल इंडिया टुरिस्ट परमिट असलेल्या प्रवासी बसमधील प्रवाशांना चढवताना किंवा उतरवताना पार्किंगबाबत कारवाई करू नये, असा आदेश परिवहन मंत्री यांच्या अध्यक्षतेखाली झालेल्या बैठकीनंतर परिवहन आयुक्त विवेक भीमनवार यांनी काढला आहे. याच धर्तीवर मालवाहतूकदार व्यावसायिकांनाही दिलासा मिळणे आवश्यक आहे, असे मत व्यक्त करत पुणे बस प्रवासी वाहतूक संघटनेने या चक्काजाम आंदोलनाला आपला पूर्ण पाठिंबा दर्शवला आहे.
Maharashtra News, Transport Strike, Pimpri Chinchwad, Pune News
#MaharashtraTransportStrike #EChallanProtest #PuneTransport #JNPTStrike #BusOperatorsSupport #MalVahatukBandh #GovernmentActionNeeded #TransporterStrike2025 #PimpriChinchwadNews #DevendraFadnavis #EknathShinde #PratapSarnaik
Reviewed by ANN news network
on
७/०४/२०२५ ०३:४१:०० PM
Rating:
कोणत्याही टिप्पण्‍या नाहीत: