मुख्यमंत्री देवेंद्र फडणवीस यांच्या नेतृत्वात महाराष्ट्राची विकासाकडे यशस्वी वाटचाल: आमदार अमित गोरखे
मुंबई, १६ जुलै २०२५: राज्याचे मुख्यमंत्री देवेंद्र फडणवीस यांच्या नेतृत्वाखाली महाराष्ट्राने आर्थिक विकास, गुंतवणूक, सहकार आणि सामाजिक न्यायाच्या क्षेत्रात अभूतपूर्व प्रगती साधली आहे, असे प्रतिपादन विधानपरिषद सदस्य आमदार अमित गोरखे यांनी आज विधानपरिषदेत २६० अंतर्गत प्रस्तावावर बोलताना केले. महायुती सरकारचे कौतुक करत गोरखे यांनी राज्याच्या विकासाचा सर्वंकष लेखाजोखा सभागृहात सादर केला.
आर्थिक विकास आणि गुंतवणुकीत महाराष्ट्र आघाडीवर
मुख्यमंत्री देवेंद्र फडणवीस यांच्या कार्यकाळात महाराष्ट्राने परकीय थेट गुंतवणूक (FDI) आकर्षित करण्यात आणि स्टार्टअप्सच्या संख्येत देशात आघाडी घेतली आहे. ₹१२० कोटींचा 'फंड ऑफ फंड्स' तयार करून स्टार्टअप इकोसिस्टमला बळकटी दिली, ज्यामुळे नवोदित उद्योजकांना मोठे आर्थिक पाठबळ मिळाले. दावोस येथे झालेल्या जागतिक परिषदेत ६३ कंपन्यांशी ₹१५ लाख ७२ हजार कोटी रुपयांचे विक्रमी सामंजस्य करार झाले, ज्यामुळे लाखो नवीन रोजगार निर्माण होण्यास आणि राज्याच्या महसुलात वाढ होण्यास मदत झाली, असे गोरखे यांनी नमूद केले.
सहकार आणि आदिवासी विकासाला नवसंजीवनी
गोरखे यांनी सहकार क्षेत्राला दिलेल्या नवसंजीवनीवरही प्रकाश टाकला. केंद्रात 'सहकार मंत्रालयाची' स्थापना हे ऐतिहासिक पाऊल होते. कृषी आणि सहकारी संस्थांच्या संगणकीकरणामुळे पारदर्शकता वाढली, तर 'अटल अर्थसहाय्य योजनेस' मुदतवाढ देऊन अनेक संस्थांना आर्थिक स्थैर्य दिले. आदिवासी समाजाच्या सर्वांगीण विकासालाही सरकारने सर्वोच्च प्राधान्य दिले असून, आदिवासी उपाययोजनेच्या तरतुदीत मागील वर्षांच्या तुलनेत ४०% वाढ केल्याचे त्यांनी सांगितले.
कोकण, पर्यटन आणि मत्स्यव्यवसाय विकासाला चालना
कोकण आणि पर्यटन विकासासाठी सरकारने विशेष पावले उचलली आहेत. कोकणातील १७ रेल्वे स्थानकांना राष्ट्रीय/राज्य महामार्गांशी जोडल्यामुळे पर्यटनाला चालना मिळाली. आंगणेवाडी मंदिराला जोडणाऱ्या रस्त्यांची कामे आणि सिंधुदुर्ग जिल्ह्यातील सागरी संग्रहालय, कृत्रिम प्रवाळ व पाणबुडी पर्यटनासारख्या महत्त्वाकांक्षी प्रकल्पांमुळे राज्याच्या पर्यटन नकाशावर सिंधुदुर्गला विशेष स्थान मिळाल्याचे गोरखे यांनी नमूद केले. मत्स्यव्यवसाय विकासासाठी समुद्रात पिंजरा पद्धतीने मत्स्यपालनाला प्रोत्साहन, मच्छिमारांसाठी नुकसान भरपाई धोरण आणि जाळी खरेदीवर ५०% अनुदानासारखे दूरगामी निर्णय घेण्यात आले आहेत.
महाराष्ट्राच्या उज्वल भविष्याचा मजबूत पाया
आमदार गोरखे यांनी समारोप करताना सांगितले की, या सर्व उपाययोजना आणि धोरणांमुळे महाराष्ट्राने विकासाच्या अनेक क्षेत्रांमध्ये आघाडी घेतली असून, राज्याच्या उज्वल भविष्यासाठी मजबूत पाया तयार झाला आहे.
Maharashtra Government, Devendra Fadnavis, Amit Gorkhe, Economic Development, Cooperation Sector, Tribal Development, Tourism, Fisheries, Maharashtra Politics
#Maharashtra #DevendraFadnavis #AmitGorkhe #MaharashtraDevelopment #EconomicGrowth #Cooperation #TribalWelfare #TourismDevelopment #Fisheries
Reviewed by ANN news network
on
७/१६/२०२५ ०५:४३:०० PM
Rating:
कोणत्याही टिप्पण्‍या नाहीत: