पिंपरी, १० जून २०२५: आकुर्डी गावठाण, पंचतारानगर, गुरुदेवनगर आणि पांढरकर वस्ती या परिसरात गेल्या काही दिवसांपासून विजेच्या लपंडावामुळे नागरिक हैराण झाले आहेत. दररोज वारंवार वीजपुरवठा खंडित होत असल्याने संतप्त नागरिकांनी आज महावितरणच्या भोसरी विभागातील अधिकाऱ्यांची भेट घेऊन आपल्या समस्या मांडल्या. अधिकाऱ्यांनी नागरिकांच्या अडचणी लवकरात लवकर दूर करण्याचे आणि नवीन ट्रान्सफॉर्मर बसवण्याचे आश्वासन दिले आहे.
'लाईट जाणे हा नित्यनियम' - नागरिक वैतागले
आकुर्डी परिसरातील स्थानिक नागरिकांच्या म्हणण्यानुसार, त्यांच्या भागात वीजपुरवठा खंडित होण्याचे प्रमाण प्रचंड वाढले आहे. "दररोज लाईट जाणे हा नित्यनियम झाला आहे," अशा शब्दांत नागरिकांनी आपली व्यथा मांडली. या सततच्या त्रासामुळे नागरिक मोठ्या प्रमाणात वैतागले आहेत.
महावितरण अधिकाऱ्यांकडून समस्या निराकरणाचे आश्वासन
आज, १० जून २०२५ रोजी आकुर्डी परिसरातील नागरिकांनी एकत्रित येऊन महावितरणच्या भोसरी विभागाचे कार्यकारी अभियंता श्री. देवकर, उपअभियंता जाधव आणि कनिष्ठ अभियंता देशपांडे यांची भेट घेतली. नागरिकांनी परिसरातील वीजपुरवठ्याच्या समस्या त्यांच्या निदर्शनास आणून दिल्या. यावर उपस्थित अधिकाऱ्यांनी नागरिकांच्या समस्या लवकरात लवकर दूर करण्याचे आश्वासन दिले.
नवीन ट्रान्सफॉर्मर बसवणार, उद्या पाहणी दौरा
अधिकाऱ्यांनी नागरिकांना भविष्यात नवीन ट्रान्सफॉर्मर बसविणे आवश्यक असल्याचे मान्य केले. तो ट्रान्सफॉर्मर डी.पी.डी.सी. (जिल्हा नियोजन व विकास समिती) च्या माध्यमातून बसवून देण्याचे आश्वासनही देण्यात आले आहे. तसेच, उद्या, ११ जून रोजी महावितरणचे सर्व अधिकारी संबंधित ठिकाणी पाहणी दौरा करून, त्याचा अहवाल तात्काळ विभागातील वरिष्ठांना सादर करतील, असेही आश्वासन यावेळी देण्यात आले.
नागरिकांची उपस्थिती
निवेदन देण्यासाठी सचिन पांढरकर, रामभाऊ पांढरकर, पंढरीनाथ थरकुडे, रामभाऊ दातीर पाटील, तुकाराम बागल, चतुर पांढरकर, अजय भालेराव, मोहन यादव, गिरीश कुलकर्णी, रोशन शिर्के आदी नागरिक उपस्थित होते.
Power Outage, Electricity Supply, Citizen Grievance, Pimpri-Chinchwad, Akurdi, MSEDCL, Public Protest, Infrastructure, Local News, Maharashtra- #Akurdi #PimpriChinchwad #PowerOutage #MSEDCL #ElectricityProblem #CitizenProtest #PuneNews #LocalIssues #MaharashtraPower #PowerSupply
Reviewed by ANN news network
on
६/१०/२०२५ ०७:४३:०० PM
Rating:
कोणत्याही टिप्पण्या नाहीत: