परदेशी कंपनीला तेल पुरवण्याच्या नावाखाली व्यावसायिकाची १९ लाखांची फसवणूक

 

पिंपरी-चिंचवड, दि. २: स्वीडनमधील एका कंपनीला विशिष्ट प्रकारचे तेल (NUPRUGA SOLUTION Oil) पुरवण्यासाठी मध्यस्थी करण्याचे आणि त्यातून मोठे कमिशन मिळवण्याचे आमिष दाखवून एका ५४ वर्षीय व्यावसायिकाची तब्बल १९ लाख ३९ हजार ४२७ रुपयांची ऑनलाइन फसवणूक करण्यात आली आहे. ही घटना २ मे २०२५ ते २३ मे २०२५ या कालावधीत घडली असून, याबाबतचा गुन्हा १ जून २०२५ रोजी शिरगाव पोलीस ठाण्यात दाखल करण्यात आला आहे.

याप्रकरणी पीडित ५४ वर्षीय व्यावसायिकाने (रा. गहुंजे, ता. मावळ, जि. पुणे) शिरगाव पोलीस ठाण्यात फिर्याद दिली आहे. फिर्यादी हे आयात-निर्यात व्यवसायात आहेत. पोलिसांनी दिलेल्या माहितीनुसार, आरोपींनी संगनमत करून फिर्यादीशी संपर्क साधला. स्वीडनमधील ‘ट्रिब्युन थेराप्युटिक्स’ (Tribune Therapeutics) या कंपनीला ‘नुप्रुगा सोल्यूशन ऑइल’ची आवश्यकता असल्याचे त्यांनी सांगितले.

हे तेल भारतातील ‘कुमार एंटरप्रायझेस’चे लक्ष्मी कुमार यांच्याकडून खरेदी करून स्वीडनमधील कंपनीला पुरवण्यासाठी फिर्यादीला मध्यस्थ म्हणून काम करण्यास सांगितले. या कामासाठी मोठे कमिशन देण्याचे आमिष दाखवण्यात आले. त्यानंतर आरोपींनी वेळोवेळी वेगवेगळ्या बँक खात्यांवर फिर्यादीला एकूण १९ लाख ३९ हजार ४२७ रुपये पाठवण्यास भाग पाडले.

पैसे भरल्यानंतरही व्यवहार पूर्ण न झाल्याने आणि आरोपींकडून प्रतिसाद न मिळाल्याने आपली फसवणूक झाल्याचे फिर्यादीच्या लक्षात आले. त्यांनी शिरगाव पोलीस ठाण्यात धाव घेऊन तक्रार दाखल केली.

पोलिसांनी या प्रकरणी भारतीय न्याय संहिता (BNS) कलम ३१८(४), ३१६(२), ३(५) आणि माहिती तंत्रज्ञान कायद्याचे कलम ६६(डी) अन्वये गुन्हा दाखल केला आहे. या गुन्ह्यात पाच जणांचा सहभाग असल्याचे निष्पन्न झाले आहे:

1. नीना हॅगमन (Nina Hagman) - op.pl, ninahagman@dr.com या ईमेल आयडी आणि ४६७६६९२१३६५ या फोन नंबरची वापरकर्ती.
2. डॉ. ओन्लेजेकोरानॉन्ग (Dr. Onlejekoranong) - pcd@tribune-therapeutics.com या ईमेल आयडी आणि ४६७६६९२४०५४, ४६७६६९२३३६५ या फोन नंबरचे वापरकर्ते.
3. लक्ष्मी कुमार (कुमार एंटरप्रायझेस) - kumarenterprises2217@gmail.com या ईमेल आयडी आणि ९१४५०५१८३७ या फोन नंबरचे वापरकर्ते.
4. अर्पित शर्मा - ९७०२१९९२६९ या मोबाईल नंबरचा वापरकर्ता.
5. एक कन्सोलर - ८४१५९९३८१३ या मोबाईल नंबरचा वापरकर्ता.

या सर्वांविरुद्ध गुन्हा दाखल करण्यात आला असून, पोलीस त्यांचा शोध घेत आहेत. या गुन्ह्याचा पुढील तपास महिला पोलीस निरीक्षक श्रीमती कदम करत आहेत.

---------------------------------------------------------------------------------

#CyberFraud #OnlineScam #FinancialCrime #Pimpri #Sweden #OilFraud #PunePolice