मांजरी बुद्रुक येथे गोळीबार करून खुनाचा प्रयत्न, मुख्य आरोपी अटकेत

हडपसर (पुणे): मांजरी बुद्रुक येथे गुरुवारी सकाळी जुन्या भांडणातून चार तरुणांनी एका महिलेच्या मुलावर गोळीबार करून खुनाचा प्रयत्न केला. या गुन्ह्यात मुख्य आरोपी सचिन गंगाराम रेनकेला (३५) अटक करण्यात आली असून, आणखी एक आरोपी ताब्यात घेण्यात आला आहे.

गुरुवारी सकाळी ८ वाजता मांजरी बुद्रुक येथील गार्गी एंटरप्रायजेस समोर ही घटना घडली. आरोपी विलास दत्ता खवळे (२०, रा. सासवड रोड, सातववाडी, हडपसर), साहिल बाबुराव जगताप (२०, रा. घवाटे वस्ती, मांजरी), बसवराज विजय सुतार (२४, रा. मुंढवा) आणि सचिन गंगाराम रेनके (३५, रा. इंदीरा नगर, शिरूर) यांनी एका ४० वर्षीय महिलेच्या मुलावर जुन्या वादातून हल्ला केला.

आरोपींनी बेकायदेशीर जमाव जमवून अग्निशस्त्र आणि इतर शस्त्रे वापरली. या घटनेमुळे स्थानिक नागरिकांमध्ये भीतीचे वातावरण निर्माण झाले आहे.

हडपसर पोलीस स्टेशनमध्ये या प्रकरणी गुन्हा दाखल करण्यात आला आहे. पोलीस उपनिरीक्षक अनिल बिनवडे यांच्या नेतृत्वाखाली तपास सुरू आहे. उर्वरित आरोपींचा शोध घेण्यात येत आहे.