सोयगावात तालुक्यात वीज पडून दोन बैलांचा मृत्यू

 

शेतकऱ्याचे दीड लाखाचे नुकसान

सोयगाव, दि. १६ मे २०२५ - सोयगाव तालुक्यातील वाकडी शिवारात शुक्रवारी दुपारी तीनच्या सुमारास झाडावर वीज कोसळल्याने झाडाखाली बांधलेल्या दोन बैलांचा मृत्यू झाल्याची दुर्घटना घडली. या घटनेत शेतकरी आबा भिका चौधरी यांचे सुमारे दीड लाख रुपयांचे नुकसान झाले आहे.

दुपारी सुमारे दोन वाजता तालुक्यात अचानक विजांचा कडकडाट सुरू झाला होता. या वेळी गोंदेगाव येथील शेतकरी आबा भिका चौधरी यांच्या गट क्रमांक १६९ मधील शेतात असलेल्या झाडावर वीज कोसळली. या झाडाखाली बांधलेले दोन्ही बैल विजेच्या तडाख्यात जागीच ठार झाले.

दरम्यान, सोयगाव तालुक्यातील काही भागात या दिवशी अवकाळी पाऊस झाला होता. या घटनेनंतर महसूल आणि पशुसंवर्धन विभागाच्या अधिकाऱ्यांनी सायंकाळी सहा वाजता घटनास्थळी भेट देऊन पंचनामा केला. पंचनाम्यात शेतकरी आबा भिका चौधरी यांचे एक लाख पन्नास हजार रुपयांचे नुकसान झाल्याचे नमूद करण्यात आले आहे.

विजेचा कडकडाट आणि अवकाळी पावसामुळे शेतकऱ्यांचे मोठ्या प्रमाणात नुकसान होत असल्याने शेतकरी चिंतेत आहेत. प्रशासनाकडून नुकसानग्रस्त शेतकऱ्यांना त्वरित मदत मिळावी अशी मागणी स्थानिक शेतकऱ्यांकडून केली जात आहे.

000000000000000000

#LightningStrike #FarmerLoss #UnseasonalRain #LivestockLoss #RuralMaharashtra #SoygaonTaluka #AgricultureNews #WeatherDisaster #FarmerCrisis #NaturalCalamity