पिंपळे निलख सबवेला कै. प्रभाकर साठे यांचे नाव द्यावे : रविराज काळे

 

पिंपरी चिंचवड : पिंपरी चिंचवड महानगरपालिकेकडून रक्षक चौक, पिंपळे निलख येथे बांधण्यात येत असलेल्या सबवेला पिंपळे निलखचे प्रथम नगरसेवक आणि पिंपरी चिंचवड महापालिकेचे माजी महापौर कै. प्रभाकर साठे यांचे नाव द्यावे, अशी मागणी आम आदमी पक्षाचे युवक शहराध्यक्ष रविराज काळे यांनी केली आहे.

काळे यांनी दिलेल्या निवेदनानुसार, "१९८६ साली कै. प्रभाकर साठे यांनी पिंपळे निलख येथील नागरिकांना येण्या-जाण्यासाठी रस्ता मिळावा, यासाठी अथक परिश्रम घेतले. या रस्त्याच्या निर्मितीत त्यांचा अग्रेसर सहभाग होता. त्यामुळे रक्षक चौक येथील नव्याने बांधण्यात येत असलेल्या सबवेला त्यांचे नाव देणे हा त्यांच्या कार्याचा उचित सन्मान ठरेल."

आप युवक शहराध्यक्षांनी पुढे नमूद केले की, कै. साठे यांचे सामाजिक कार्य आणि पिंपळे निलख परिसराच्या विकासासाठी केलेले प्रयत्न तरुणांसाठी प्रेरणादायी आहेत. सबवेला त्यांचे नाव दिल्यास येणाऱ्या पिढ्यांना त्यांच्या कार्याची ओळख होऊन प्रेरणा मिळेल.

सध्या पिंपरी चिंचवड महानगरपालिकेकडून रक्षक चौक येथील सबवेचे काम युद्धपातळीवर सुरू आहे. या प्रकल्पामुळे परिसरातील वाहतूक कोंडी कमी होण्यास मदत होणार आहे. महापालिकेच्या अधिकाऱ्यांनी दिलेल्या माहितीनुसार, हा सबवे लवकरच पूर्ण होऊन वाहतुकीसाठी खुला केला जाणार आहे.

पिंपळे निलख परिसरातील नागरिकांनीही या मागणीला पाठिंबा दर्शवला असून, महापालिका प्रशासनाने याबाबत सकारात्मक निर्णय घ्यावा, अशी अपेक्षा व्यक्त केली जात आहे.

............................

 #PimpriChinchwad 

#RakshakChowk 

#PrabhakarSathe 

#PCMCSubway 

#InfrastructureProjects 

#AAP 

#RavirajKale 

#MarathiNews