नगरपालिकेतील तीन कर्मचाऱ्यांविरुद्ध भ्रष्टाचार प्रकरणी गुन्हा दाखल

इगतपुरी नगरपालिकेत १.७० लाख रुपयांच्या लाचखोरीचा पर्दाफाश

नाशिक: इगतपुरी नगरपालिकेतील तीन कर्मचाऱ्यांकडून सीसीटीव्ही कॅमेरे व कॉम्प्युटर दुरुस्तीच्या बिलाच्या मोबदल्यात १ लाख ७० हजार रुपयांची लाच मागितल्याप्रकरणी लाचलुचपत प्रतिबंधक विभागाने कारवाई केली आहे. या प्रकरणी भ्रष्टाचार प्रतिबंध कायद्यांतर्गत गुन्हा दाखल करण्यात आला आहे.

आरोपींमध्ये सुरज रवींद्र पाटील (वय ३२ वर्षे), संगणक अभियंता, नितीन दगडू लोखंडे (वय ४४ वर्षे), सफाई कामगार आणि सोमनाथ ज्ञानेश्वर बोराडे (वय ३५ वर्षे), लेखापाल या तिघांचा समावेश आहे. हे सर्व कर्मचारी इगतपुरी नगरपालिकेत कार्यरत आहेत.

प्रकरणाचा तपशील पाहता, तक्रारदाराने इगतपुरी नगरपालिकेच्या हद्दीत सीसीटीव्ही कॅमेरे व कॉम्प्युटर देखभाल दुरुस्तीचे काम पूर्ण केले होते. या कामाचे एकूण बिल १७ लाख ५० हजार रुपये होते. त्यापैकी ८ लाख ६७ हजार रुपयांचा धनादेश तक्रारदाराला देण्यात आला होता.

उर्वरित बिलाच्या पैशांसाठी आरोपींनी अतिरिक्त पैसे मागितले. त्यांनी स्वतःसाठी तसेच मुख्याधिकाऱ्यांसाठी २७ टक्के प्रमाणे १ लाख ९० हजार रुपयांची मागणी केली. तसेच किमान १ लाख ७० हजार रुपये देण्यास सांगितले.

या मागणीमुळे त्रस्त झालेल्या तक्रारदाराने लाचलुचपत प्रतिबंधक विभाग, नाशिक कार्यालयात तक्रार दाखल केली. लाप्रवि नाशिक पथकाने सापळा आयोजित करण्यापूर्वी पडताळणी केली. या दरम्यान आरोपी सुरज रवींद्र पाटील, नितीन दगडू लोखंडे आणि सोमनाथ ज्ञानेश्वर बोराडे यांनी लाचेची मागणी केल्याचे सिद्ध झाले.

या प्रकरणी १४ मे २०२५ रोजी इगतपुरी पोलीस ठाण्यात गुन्हा क्रमांक ८८/२०२५ अंतर्गत भ्रष्टाचार प्रतिबंध अधिनियम १९८८ चे कलम ७ व १२ नुसार गुन्हा दाखल करण्यात आला आहे.

लाचलुचपत प्रतिबंधक विभागाने नागरिकांना आवाहन केले आहे की, भ्रष्टाचारासंबंधी माहिती असल्यास किंवा लाच मागणाऱ्या लोकसेवकांविषयी तक्रार असल्यास लाचलुचपत प्रतिबंधक विभाग, नाशिक परिक्षेत्र, नाशिक येथे संपर्क साधावा.