पावसामुळे रत्नागिरी-मुंबई महामार्गावर धोका; जिल्हाधिकाऱ्यांकडून पाहणी आणि प्रतिबंधात्मक उपाययोजनांचे निर्देश
रत्नागिरी, दि. २६: गेल्या चार दिवसांपासून रत्नागिरी जिल्ह्यात कोसळणाऱ्या मुसळधार पावसामुळे मुंबई-गोवा महामार्गावर अनेक ठिकाणी धोकादायक परिस्थिती निर्माण झाली आहे. या पार्श्वभूमीवर जिल्हाधिकारी तथा जिल्हा आपत्ती व्यवस्थापन प्राधिकरणाचे अध्यक्ष एम. देवेंदर सिंह यांनी तातडीने महामार्गावरील धोकादायक ठिकाणे, घाट परिसर, पूल आणि रस्त्यांची पाहणी केली.
पाहणीदरम्यान, जिल्हाधिकाऱ्यांनी संबंधित विभागांना सुरक्षिततेच्या दृष्टीने तातडीने प्रतिबंधात्मक उपाययोजना करण्याचे निर्देश दिले. धोकादायक ठिकाणी आवश्यक सूचना फलक लावणे, वाहतूक सुरळीत ठेवण्यासाठी कर्मचाऱ्यांची नेमणूक करणे आणि संभाव्य धोके टाळण्यासाठी तात्काळ कार्यवाही करण्याचे आदेश त्यांनी दिले.
याव्यतिरिक्त, जिल्हाधिकाऱ्यांनी तहसील कार्यालय लांजा येथील नियंत्रण कक्षाला भेट देऊन परिस्थितीचा आढावा घेतला. त्यांनी लांजा तालुकास्तरीय अधिकाऱ्यांची बैठक घेऊन मान्सून काळात घ्यावयाची दक्षता याबद्दल मार्गदर्शन केले. विविध विभागांनी समन्वय साधून काम करावे आणि कोणत्याही आपत्कालीन स्थितीत त्वरित प्रतिसाद देण्यासाठी सज्ज राहावे, असे निर्देश त्यांनी यावेळी दिले.
आज जिल्हाधिकारी एम. देवेंदर सिंह यांनी तालुका आपत्ती व्यवस्थापन प्राधिकरणाची बैठक घेतली. या बैठकीत त्यांनी राजापूर तालुक्यात मागील काही दिवसात झालेल्या नुकसानीचा आढावा घेतला. तसेच, तालुक्यातील धोकादायक, दरडप्रवण क्षेत्रे आणि पूरपरिस्थितीमध्ये घ्यावयाची काळजी याबद्दल संबंधित विभागांना मार्गदर्शन केले. त्यांनी राजापूर शहरातील पूर येण्याची शक्यता असलेल्या भागांना प्रत्यक्ष भेट देऊन पाहणी केली आणि आवश्यक उपाययोजना करण्याच्या सूचना प्रशासनाला दिल्या.
--------------------------------------------------------------------------------------------------------
#RatnagiriRains #MumbaiGoaHighway #DisasterManagement #MonsoonPreparedness #DistrictCollector #MaharashtraRains #SafetyFirst #Lanja #Rajapur #HeavyRain
Reviewed by ANN news network
on
५/२६/२०२५ ०७:१८:०० PM
Rating:
कोणत्याही टिप्पण्‍या नाहीत: