फुरसुंगी हरपळे आळी : हुंडा प्रथेचा आणखी एक बळी; विवाहितेची आत्महत्या

फुरसुंगी (पुणे): हरपळे आळी येथे २७ वर्षीय विवाहिता प्रतीक्षा राजेंद्र हरपळे हिने गळफास घेऊन आत्महत्या केली आहे. मृताच्या आईने पोलिस स्टेशनमध्ये तक्रार दाखल करून सासरच्या मंडळींनी हुंडा मागणी करून मानसिक व शारीरिक छळ केल्यामुळे मुलीला आत्महत्येस प्रवृत्त केल्याचा गंभीर आरोप केला आहे.

४७ वर्षीय आईने दिलेल्या तक्रारीनुसार, ११ जून २०२० ते ६ एप्रिल २०२५ या कालावधीत प्रतीक्षाचा पती, सासू-सासरे आणि इतर नातेवाईकांनी तिला सतत माहेरहून पैशाची मागणी केली. हुंड्याच्या मागणीसह शारीरिक व मानसिक छळ करण्यात आला, असे आरोप आहेत.

या सतत छळामुळे त्रस्त झालेल्या प्रतीक्षाने शेवटी राहत्या घरी गळफास घेऊन जीवन संपवले. मृताच्या कुटुंबीयांचे म्हणणे आहे की, सासरच्या मंडळींच्या हुंडाग्रस्त वागण्यामुळेच ही दुर्दैवी घटना घडली आहे.

फुरसुंगी पोलीस स्टेशनमध्ये या प्रकरणी हुंडा प्रतिबंधक कायद्यांतर्गत तसेच आत्महत्येस प्रवृत्त केल्याच्या कलमाखाली गुन्हा दाखल करण्यात आला आहे. सहाय्यक पोलीस निरीक्षक किशोर पवार यांच्या नेतृत्वाखाली तपास सुरू आहे. आरोपींना अद्याप अटक करण्यात आलेली नाही.

या घटनेमुळे हुंडाप्रथेच्या दुष्परिणामांकडे पुन्हा लक्ष वेधले गेले आहे.