वेगवेगळ्या समाज घटकांचा भाऊसाहेब भोईरांना पाठिंबा

 

पिंपरी चिंचवड (प्रतिनिधी) : "आमच्या समाजाला आतापर्यंत सर्वच पक्षांनी गृहीत धरले आहे, परंतु भाऊसाहेब भोईर हे एकमेव नेते आहेत, ज्यांनी नेहमीच आमच्या समाजासाठी सहकार्याची भावना ठेवली आहे," असे मत सकल धनगर समाज व सकल मातंग समाजाने व्यक्त केले. अजंठा नगर येथील संत बाळू मामा मंदिरात नुकतीच या समाजांची बैठक पार पडली, ज्यामध्ये चिंचवड विधानसभेचे अपक्ष उमेदवार भाऊसाहेब भोईर यांनी सहभागी होऊन समाजाच्या समस्यांवर संवाद साधला.

भाऊसाहेब भोईर यांनी समाजाच्या शैक्षणिक व आर्थिक प्रगतीसाठी सदैव कटिबद्ध राहण्याचे आश्वासन दिले. धनगर समाजासाठी आरक्षणाचा प्रश्न आणि मातंग समाजाच्या लोकसंख्येनुसार वर्गवारी (अ, ब, क, ड) निश्चित करण्यासाठी प्रामाणिकपणे प्रयत्न करण्याचे ते म्हणाले. त्यांनी राजमाता अहिल्यादेवी होळकर यांचे स्मारक उभारण्यासाठी शासनाकडे पाठपुरावा करण्याचे तसेच हाफकिन महामंडळाच्या पाच एकर जागेच्या ठरावाचा आर्टी निर्मितीसाठी उपयोग होईल याची खात्री देण्याचे आश्वासन दिले.

या बैठकीत धनगर समाज व मातंग समाजाच्या बांधवांनी भाऊसाहेब भोईर यांचे स्वागत करून त्यांच्या प्रयत्नांबद्दल समाधान व्यक्त केले. यापुढे समाज म्हणून भाऊसाहेब भोईर यांच्या सोबत राहून त्यांना पाठिंबा देण्याचा निर्धार या समाज घटकांनी व्यक्त केला. 

समाज बांधवांच्या समस्या सोडविण्याच्या उद्देशाने या संवाद बैठकीचे आयोजन धनगर समाज बांधव समन्वयक अशोक खरात, गणेश खरात आणि सकल मातंग समाज प्रदेश समन्वयक युवराज दाखले यांनी केले होते. चिंचवड मतदारसंघाचे अपक्ष उमेदवार भाऊसाहेब भोईर यांना सर्वतोपरी सहकार्य करून निवडणुकीत आघाडी मिळवून देऊ, असे आश्वासन या समाज घटकांनी दिले.

या प्रसंगी बाळासाहेब ओव्हाळ, सुरेश भिसे, शिवशाही व्यापारी संघाचे प्रदेश उपाध्यक्ष मंगेश डाखोरे, वाहतूक आघाडी पिंपरी चिंचवड शहर अध्यक्ष अनिल तांबे, डी. पी खंडाळे, रामदास कांबळे, नंदु कारके, महिला आघाडी प्रदेश सचिव कल्पना मोरे, प्रदेश अध्यक्षा संचिता गोसावी, मोनाली नलावडे, अश्विन जाधव, किशोर केळे, विरोद मोठे, भाऊसाहेब हरणावर, मधुकर कोळेकर, विजय देंडे, नाना वारे यांच्यासह शेकडो पदाधिकारी उपस्थित होते.