सिंहगड रस्त्यावरील वाहतूक सुधारणेसाठी एकात्मिक आराखडा : माधुरी मिसाळ

 

सिंहगड रस्त्यावर मेट्रो प्रकल्पाला मिळाली मंजुरी

पुणे (वृत्तसेवा): सिंहगड रस्त्यावरील वाहतूक कोंडी दूर करण्यासाठी एकात्मिक वाहतूक आराखड्याची अंमलबजावणी सुरू असल्याची माहिती पर्वती विधानसभा मतदारसंघाच्या भाजप महायुती उमेदवार आमदार माधुरी मिसाळ यांनी दिली.

राजाराम पूल चौकातील 520 मीटर लांबीचा उड्डाणपूल पूर्ण झाला असून, राजाराम पूल ते फनटाइम थिएटर, विठ्ठलवाडी ते फनटाइम थिएटर आणि इंडियन ह्यूम पाईप गेट ते इनामदार चौक या उड्डाणपुलांची 75 टक्के कामे पूर्ण झाली आहेत. उर्वरित काम मार्च 2025 पर्यंत पूर्ण होणार आहे.

खडकवासला-स्वारगेट-खराडी या 25.56 किलोमीटर मार्गावरील मेट्रोच्या दुसऱ्या टप्प्याला राज्य शासनाने मान्यता दिली असून, या मार्गावर 22 स्टेशन्स असतील. या प्रकल्पासाठी 8,131 कोटी रुपयांचा खर्च अपेक्षित आहे.

वाहतूक कोंडी टाळण्यासाठी धायरी ते विश्रांतीनगर, जनता वसाहत, नीलायम टॉकीज आणि गंगा भाग्योदय ते सनसिटी असे पर्यायी मार्ग विकसित करण्यात आले आहेत.

राजाराम पूल, नवशा मारुती, सरीता नगरी, दत्तवाडी, पानमळा परिसरात आयोजित पदयात्रेदरम्यान आनंद रिठे, अनिता कदम, राजू कदम यांच्यासह अनेक कार्यकर्ते उपस्थित होते.