युवा कलाकारांच्या मुकुल कला महोत्सवाला उत्स्फूर्त प्रतिसाद

 

कोथरूडमध्ये विविध कलांचा अनोखा संगम

पुणे : कलावर्धिनी चॅरिटेबल ट्रस्ट आणि अरुंधती पटवर्धन यांच्या संयुक्त विद्यमाने आयोजित 'मुकुल कला महोत्सव' बाल शिक्षण मंदिर सभागृह, कोथरूड येथे यशस्वीरीत्या संपन्न झाला. कार्यक्रमाला ज्येष्ठ नृत्य गुरू डॉ. सुचेता भिडे-चापेकर आणि भारती विद्यापीठ स्कूल ऑफ परफॉर्मिंग आर्ट्सचे प्रमुख शारंगधर साठे यांची प्रमुख पाहुणे म्हणून उपस्थिती होती.

या विनामूल्य कार्यक्रमात विविध कलाप्रकारांचे सादरीकरण करण्यात आले. कृष्णा साळुंके यांच्या शिष्यांचे पखवाज वादन, आरुषी जोशी यांचे गायन, रिया गोखले यांचे कथक नृत्य, डॉ. देविका बोरठाकूर यांच्या शिष्यांचे सत्रीय नृत्य आणि श्रीमती अनुजा बाठे यांच्या शिष्यांचे भरतनाट्यम् या कलाप्रकारांनी रसिकांची मने जिंकली.

कार्यक्रमाच्या उद्घाटनप्रसंगी बोलताना शारंगधर साठे यांनी युवा कलाकारांना व्यासपीठ देण्याच्या या उपक्रमाचे महत्त्व विशद केले. भारतीय शास्त्रीय कलांच्या जतनासाठी भारती विद्यापीठाच्या सहकार्याचेही त्यांनी आश्वासन दिले.

विशेष उल्लेखनीय बाब म्हणजे आसाममधील सत्रीय नृत्यशैलीच्या सादरीकरणाने रसिकांची विशेष दाद मिळवली. गौरी स्वकुळ यांनी सूत्रसंचालन केले.