महाविकास आघाडीला १६० ते १६५ जागा; राज्यात सत्तांतर निश्चित : संजय राऊत

 

चिंचवडमध्ये कलाटेंचा विजय निश्चित - संजय राऊत

चिंचवड (प्रतिनिधी): महाराष्ट्रात महाविकास आघाडीचे सरकार स्थापन होणार असून, १६० ते १६५ जागांसह सत्तेत येणार असल्याचा विश्वास शिवसेना (उबाठा) चे खासदार संजय राऊत यांनी व्यक्त केला. चिंचवड मतदारसंघात महाविकास आघाडीचे उमेदवार राहुल कलाटे यांच्या प्रचारार्थ आयोजित कार्यक्रमात ते बोलत होते.

राऊत यांनी प्रधानमंत्री नरेंद्र मोदी यांच्या मुंबईतील सभेवर टीका करताना, लाखभर खुर्च्यांसाठी केवळ पाच हजार श्रोते उपस्थित असल्याचे सांगितले. सध्याचे मुख्यमंत्री एकनाथ शिंदे यांचे भविष्य २३ तारखेनंतर अंधकारमय असेल, असा इशाराही त्यांनी दिला.

शरद पवार, उद्धव ठाकरे आणि राहुल गांधी यांच्या सभांना मिळत असलेला प्रचंड जनसमुदाय पाहता जनतेने सत्ता बदलाचा निर्णय घेतल्याचे राऊत यांनी नमूद केले. निष्ठावंत शिवसैनिक उद्धव ठाकरेंसोबत असल्याचेही त्यांनी स्पष्ट केले.

कार्यक्रमास राष्ट्रवादीचे प्रवक्ते अंकुश काकडे, माजी आमदार ऍड. गौतम चाबुकस्वार, शिवसेना शहरप्रमुख ऍड. सचिन भोसले यांच्यासह अनेक पदाधिकारी उपस्थित होते.

विशेष म्हणजे १७ तारखेला बाळासाहेब ठाकरे यांच्या स्मृतिदिनानिमित्त शिवतीर्थावर सभा घेण्याचा निर्धारही राऊत यांनी व्यक्त केला.