भारतीय विद्या भवनमध्ये 'रसरंग' नृत्य महोत्सव

 

 "नुपूर झंकार अकादमीच्या कलाकारांचे भरतनाट्यम सादरीकरण"

पुणे  (प्रतिनिधी) - भारतीय विद्या भवन आणि इन्फोसिस फाऊंडेशनच्या सांस्कृतिक प्रसार कार्यक्रमांतर्गत 'रसरंग' या भरतनाट्यम नृत्य सादरीकरणाचा कार्यक्रम शनिवारी सायंकाळी संपन्न झाला.

नुपूर झंकार अकादमीच्या वतीने सादर करण्यात आलेल्या या कार्यक्रमात नृत्य प्रशिक्षक रूपा जोशी यांच्या शिष्या नेहा म्हमाणे, अदिती जोशी आणि ऋजुता अदवंत यांनी विलोभनीय नृत्य सादर केले.

प्रेम रंग, शून्यातून शुन्याकडे, कृष्णकला, रासक्रिडा अशा बहारदार नृत्य रचनांसह शांत, श्रृंगार, हास्य, करुण, वीर अशा विविध रसांचा आविष्कार कार्यक्रमात सादर करण्यात आला.

सरदार महादेव बळवंत नातू सभागृहात झालेल्या या विनामूल्य कार्यक्रमाचे सूत्रसंचालन नीना भेडसगावकर यांनी केले, तर भारतीय विद्या भवनचे मानद सचिव प्रा. नंदकुमार काकिर्डे यांनी स्वागत व कलाकारांचा सत्कार केला.

हा कार्यक्रम भारतीय विद्या भवन व इन्फोसिस फाऊंडेशनच्या सांस्कृतिक प्रसार उपक्रमांतर्गत होणारा २२८वा कार्यक्रम होता.