कुरिअर डिलिव्हरीच्या माहितीवरून उलगडला खुनाचा गुन्हा; २४ तासांत दोन आरोपी ताब्यात

 

पिंपरी : पिंपरी-चिंचवड पोलिसांच्या गुंडा विरोधी पथकाने कुरिअर डिलिव्हरीच्या माहितीच्या आधारे एका खुनाचा गुन्हा उलगडून अवघ्या २४ तासांत दोन आरोपींना वाशिम जिल्ह्यातून ताब्यात घेतले आहे.

८ सप्टेंबर २०२४ रोजी पहाटे सांगवी पोलीस ठाणे हद्दीतील जिल्हा रुग्णालय, औंध, पुणे येथे एका अनोळखी पुरुषाचा डोक्यात मोठा दगड घालून खून झाल्याची घटना उघडकीस आली होती. पोलिसांनी तात्काळ तपास सुरू करून परिसरातील सीसीटीव्ही फुटेज तपासले असता, दोन संशयित व्यक्ती मृत व्यक्तीसोबत दुचाकीवर तिघेजण बसून सांगवी परिसरात दारू पिण्यासाठी आल्याचे दिसून आले.

पुढील तपासात एक संशयित कृष्णा चौकातील एका कुरिअर कंपनीत गेल्याचे आढळले. त्याच्या मोबाईल लोकेशनच्या आधारे पोलीस पथक पारनेर, जि. अहमदनगर येथे पोहोचले. तेथील एका हॉटेलमधील सीसीटीव्ही फुटेजमध्ये संशयित आढळल्यानंतर त्याच्या प्रवासाचा मार्ग शोधून पोलिसांनी पाठलाग सुरू केला.

संशयित उत्तर प्रदेशकडे पळून जाण्याच्या प्रयत्नात असताना त्यांना समृद्धी महामार्गावरील शेलू टोल प्लाझा, जि. वाशिम येथे ट्रॅव्हल बस अडवून ताब्यात घेण्यात आले. अटक करण्यात आलेल्या दोन आरोपींची नावे शिवमंगल सिंग (३८) आणि सोमदत्त मनमोहन दुबे (२२) अशी आहेत, दोघेही उत्तर प्रदेशातील चित्रकूट जिल्ह्यातील रहिवासी आहेत.

चौकशीत आरोपींनी कबुली दिली की त्यांनी आपला मित्र पप्पू उर्फ जितेंद्र त्रिपाठी याचा सततच्या भांडणाच्या कारणावरून खून केला. त्यांनी जिल्हा रुग्णालय, औंध येथील मागील मोकळ्या जागेत नायलॉन दोरीने गळा आवळून व डोक्यात दगड घालून खून केल्याचे कबूल केले.

आरोपींविरुद्ध सांगवी पोलीस ठाण्यात भारतीय न्याय संहिता कलम १०३(१) आणि ३(५) अंतर्गत गुन्हा दाखल करण्यात आला आहे.

या यशस्वी कारवाईमुळे पिंपरी-चिंचवड पोलिसांच्या कार्यक्षमतेचे कौतुक होत असून, गुन्हेगारीवर आळा घालण्यासाठी पोलिसांच्या तत्परतेचे हे एक उत्कृष्ट उदाहरण मानले जात आहे.