पिंपरी-चिंचवड शहरातील शाळेत विद्यार्थ्यांना अन्नविषबाधा

पुणे : डॉ. डी. वाय. पाटील इंग्रजी माध्यम शाळेत (शाहूनगर) झालेल्या अन्नविषबाधेच्या घटनेत सुमारे ३० विद्यार्थी आजारी पडले असून त्यांना रुग्णालयात दाखल करण्यात आले आहे. शाळेतील एका कार्यक्रमादरम्यान दिलेल्या सँडविचमुळे ही घटना घडली असल्याचे सांगण्यात येत आहे.

प्राथमिक विभागातील सुमारे ४०० विद्यार्थ्यांनी शाळेतील कार्यक्रमात ब्रेड आणि चटणीचे सँडविच खाल्ले. काही वेळेतच अनेक विद्यार्थ्यांना उलट्या, मळमळ आणि चक्कर येण्याची लक्षणे दिसू लागली. पालकांनी शाळेवर निकृष्ट दर्जाचे अन्न पुरवल्याचा आरोप केला आहे.

एमआयडीसी भोसरी पोलीस ठाण्याचे वरिष्ठ निरीक्षक गणेश जामदार यांनी सांगितले की, "सुमारे ३० विद्यार्थ्यांना अन्नविषबाधा झाली आहे. अन्न निरीक्षक तपास करत असून अहवालानुसार पुढील कारवाई केली जाईल."

खासगी रुग्णालयात दाखल १८ विद्यार्थ्यांवर उपचार सुरू असून, त्यांपैकी ६ विद्यार्थ्यांना सलाईन लावण्यात आली आहे. डॉ. धनंजय पाटील यांनी सांगितले की, "सर्व विद्यार्थ्यांची स्थिती स्थिर आहे आणि त्यांच्यावर योग्य उपचार केले जात आहेत."

शाळेचे अध्यक्ष अभय कोटकर यांनी या घटनेबद्दल खेद व्यक्त करत पालकांची माफी मागितली. सँडविचमधील घटक तपासणीसाठी पाठवले असून, दोषींवर कठोर कारवाई केली जाईल असे त्यांनी सांगितले.

या घटनेने शालेय पोषण आहाराच्या गुणवत्तेबद्दल गंभीर प्रश्न निर्माण केले असून, संबंधित अधिकाऱ्यांकडून सखोल चौकशीची मागणी पालकांनी केली आहे.