पोलीस सहाय्यक फौजदाराने घेतली लाच; लाचलुचपत प्रतिबंधक विभागाने पकडले रंगेहाथ!

 

संगमनेर : संगमनेर तालुक्यातील आश्वी पोलीस ठाण्याचे सहाय्यक फौजदार रविंद्र भानुदास भाग्यवान (वय ५२) यांना लाचलुचपत प्रतिबंधक विभागाने ९ हजार रुपयांची लाच स्वीकारताना रंगेहाथ पकडले आहे. ही घटना रविवार, दिनांक २१ सप्टेंबर २०२४ रोजी घडली.

प्राप्त माहितीनुसार, तक्रारदाराच्या चुलत भावाविरुद्ध आश्वी पोलीस ठाण्यात दाखल गुन्ह्यात संबंधित व्यक्तीला तहसीलदार कार्यालयात नेण्याची कारवाई टाळण्यासाठी आणि गुन्ह्यात तडजोड करण्यासाठी आरोपी सहाय्यक फौजदाराने लाचेची मागणी केली होती.

लाचलुचपत प्रतिबंधक विभाग, अहमदनगर येथे या प्रकरणाची तक्रार प्राप्त झाल्यानंतर विभागाने सापळा रचला. पडताळणीदरम्यान आरोपीने सुरुवातीला १० हजार रुपयांची मागणी केली, परंतु नंतर तडजोडीअंती ९ हजार रुपयांवर सहमती दर्शवली. सापळा कारवाईत आरोपीने ९ हजार रुपयांची लाच स्वीकारताना त्यांना पकडण्यात आले.

या प्रकरणी आश्वी पोलीस ठाण्यात गुन्हा रजिस्टर क्रमांक १६५/२०२४ अंतर्गत भ्रष्टाचार प्रतिबंध अधिनियम १९८८ च्या कलम ७ नुसार गुन्हा दाखल करण्यात आला आहे.

लाचलुचपत प्रतिबंधक विभागाने नागरिकांना आवाहन केले आहे की भ्रष्टाचारासंबंधी कोणतीही माहिती किंवा लाच मागणाऱ्या लोकसेवकांबद्दल तक्रार असल्यास त्यांच्याशी संपर्क साधावा. विभागाचे संकेतस्थळ, ई-मेल, ऑनलाइन तक्रार अॅप्लिकेशन, टोल फ्री क्रमांक आणि व्हॉट्सअॅप क्रमांक यांच्या माध्यमातून संपर्क साधता येईल.