भाजप पुन्हा सत्तेत येण्याची शक्यता दिसल्याने शेअरबाजारात अभूतपूर्व तेजी!

 

मुंबई : भाजप आणि मित्रपक्षांचे सरकार पुन्हा एकदा सत्तेत येणार असा अंदाज बहुतेक सर्व एक्झिट पोल्सनी वर्तवताच आज शेअरबाजाराने प्रचंड उसळी घेतली. बीएसई सेन्सेक्स 2,622 अंकांनी किंवा 3.55 टक्क्यांनी वाढून 76,583.30 वर गेला तर एनएसई निफ्टी देखील 807 अंकांनी वाढून 23,337.70 वर उघडला.दोन्ही निर्देशांक विक्रमी उच्चपातळीवर उघडले.

बहुतेक एक्झिट पोलच्या निकालांनी पंतप्रधान नरेंद्र मोदींच्या नेतृत्वाखालील एनडीए साठी ऐतिहासिक तिस-या टर्मचा अंदाज वर्तवला आहे कारण युतीला 350 पेक्षा जास्त जागा जिंकण्याचा अंदाज आहे. तीन एक्झिट पोल – इंडिया टुडे-माय ॲक्सिस इंडिया, इंडिया टीव्ही-सीएनएक्स आणि न्यूज24-टूडेज चाणक्य – एनडीएसाठी 400 हून अधिक जागांचा अंदाज वर्तवला आहे.

निफ्टी बँकिंग इंडेक्सने प्रथमच 50,000 ची पातळी ओलांडल्याने सर्व बँक समभाग उघडल्यानंतर लगेचच चांगले वधारले.

विरोधी पक्षांनी एक्झिट पोल "पक्षपाती" असल्याचा आरोप केला असला तरीही, बाजाराने एक्झिट पोलला सकारात्मक प्रतिसाद दिला आहे.

 तथापि, बाजारातील तज्ज्ञांनी, गुंतवणूकदारांना, विशेषत: लहान गुंतवणूकदारांना सावधगिरी बाळगण्याचा सल्ला दिला आहे, तज्ज्ञांनी असे म्हटले की बाजार काही काळ अस्थिर राहील आणि कोणताही गुंतवणूक निर्णय घेण्यापूर्वी उद्या अंतिम निकालाची प्रतीक्षा करा.

एक्झिट पोल व्यतिरिक्त, गेल्या आठवड्यात जाहीर केलेल्या अनुकूल आर्थिक वाढीच्या आकड्यांमुळेही बाजार वाढला, आर्थिक वर्ष 24 मध्ये जीडीपी वाढ 8.2 टक्के आहे आणि जीएसटी आकड्यांचे महिनोन्महिने उत्साहवर्धक संकलन आहे.

व्यवहाराच्या पहिल्या तासानंतर, निफ्टी 650 हून अधिक अंकांच्या वाढीसह 23,180 वर व्यवहार करत होता, तर बीएसई सेन्सेक्स 2100 अंकांनी वाढून 76,060 वर होता.