लाचखोर तहसीलदाराच्या घरांमध्ये सापडले लाखो रुपयांचे घबाड!

तहसीलदारासह, चालक आणि शिपाई सापडले अ‍ॅन्टीकरप्शन ब्युरोच्या जाळ्यात

बुलढाणा : बुलढाणा जिल्ह्यातील सिंदखेडराजा येथील तहसीलदारासह त्याच्यासाठी लाच मागून ते स्वीकारणारे चालक आणि शिपाई यांना अ‍ॅन्टीकरप्शन ब्युरोच्या अधिकार्‍यांनी पकडले आहे. दरम्यान तहसीलदाराच्या शासकीय निवासस्थानी आणि परभणी येथील त्याच्या घरी लाखो रुपयांची रोकड सापडली आहे.

सचिन शंकरलाल जैस्वाल, वय ४३ वर्ष, पद – तहसिलदार, वर्ग -१,  मंगेश शालीग्राम कुलथे, वय ४० वर्ष, पद - चालक, पंजाबराव तेजराव ताठे, वय ५५ वर्ष, पद- शिपाई,  तहसिल कार्यालय, सिंदखेडराजा जि. बुलढाणा अशी कारवाई झालेल्या तिघांची नावे आहेत.

अ‍ॅन्टीकरप्शन ब्युरोच्या अधिकार्‍यांनी तहसीलदार जैस्वाल याच्या शासकीय निवासस्थानी घेतलेल्या झडतीत ३७ लाख ५२ हजार १८० रुपये आणि त्याच्या परभणी येथील राहत्या घरी ९ लाख ४० हजार रुपये रोख सापडले आहेत. त्याच्या अन्य मालमत्तांचा शोध सुरू आहे.

या प्रकरणातील तक्रारदाराचा वाळूचा व्यवसाय आहे. महसूल खात्याने वाळूचा लिलाव केला असल्यास तो घेऊन ते वाळू उत्खननाचा व्यवसाय करतात. मात्र, अलिकडे या भागात वाळूचा लिलाव झालेला नाही. बेकायदेशीरपणे वाळू उत्खनन करून वाहतूक करण्याकडे दुर्लक्ष करण्यासाठी  तहसीलदार जैस्वाल याला लाच हवी होती. त्याच्यासाठी चालक कुलथे याने दरमहा ३५ हजार रुपयांची लाच तक्रारदाराकडे मागितली.शिपाई ताठे याने त्याला दुजोरा देत प्रोत्साहन दिले.

१२ एप्रिल रोजी अ‍ॅन्टीकरप्शन ब्युरोच्या अधिकार्‍यांनी सापळा रचला आणि कुलथे याला तहसीलदार जैस्वाल याच्यासाठी ३५ हजार रुपयांची लाच घेताना रंगेहाथ पकडले.त्यानंतर तहसीलदार आणि शिपाई या दोघांनाही ताब्यात घेण्यात आले. 

या प्रकरणी सिंदखेडराजा पोलीसठाण्यात गुन्हा दाखल करण्यात आला आहे.