हरियाणा, बिहार अन् मुंबईतून ३ ठगांना बेड्या; 'अल शिफा ट्रॅव्हल्स'च्या बनावट नोकरी रॅकेटचा पोलिसांकडून पर्दाफाश

मुंबई:परदेशात चांगल्या पगाराची नोकरी लावण्याचे आमिष दाखवून सर्वसामान्यांची आर्थिक व मानसिक फसवणूक करणाऱ्या एका आंतरराज्यीय टोळीचा पायधुनी पोलीस ठाण्याच्या पथकाने पर्दाफाश केला आहे. मस्जिद बंदर (पश्चिम) येथील 'अल शिफा ट्रॅव्हल्स' या बनावट कार्यालयाच्या माध्यमातून हे रॅकेट चालवले जात होते. या प्रकरणात पायधुनी पोलिसांनी कौशल्याने आणि तांत्रिक विश्लेषणाचा वापर करत तब्बल तीन वेगवेगळ्या राज्यांतून ३ प्रमुख आरोपींना बेड्या ठोकल्या आहेत. आरोपींच्या ताब्यातून ५० मूळ भारतीय पासपोर्टसह लॅपटॉप, मोबाईल आणि अनेक आक्षेपार्ह दस्तऐवज जप्त करण्यात आले आहेत.

मिळालेल्या माहितीनुसार, आरोपींनी मस्जिद बंदर (पश्चिम) येथील 'अल शिफा ट्रॅव्हल्स' नावाच्या कार्यालयातून परदेशात नोकरीच्या शोधात असलेल्या इच्छुकांशी संपर्क साधला होता. फिर्यादी आणि इतर अनेक उमेदवारांना विदेशात आकर्षक पगाराची नोकरी मिळवून देण्याचे आमिष दाखवण्यात आले. या बहाण्याने आरोपींनी त्यांचे मूळ पासपोर्ट, बायोडाटा (Biodata) आणि प्रक्रियेच्या नावाखाली प्रत्येकी १५,०००/- रुपये उकळले. मात्र, पैसे आणि कागदपत्रे घेतल्यानंतर कोणतीही नोकरी न देता, आरोपींनी आपले कार्यालय तडकाफडकी बंद केले आणि मोबाईल नंबर बंद करून पसार झाले. आपली फसवणूक झाल्याचे लक्षात येताच पीडितांनी पायधुनी पोलीस ठाण्यात धाव घेतली.

फिर्यादीच्या तक्रारीवरून पायधुनी पोलीस ठाण्यात गुन्हा नोंद क्रमांक ८८६/२०२६ अन्वये भारतीय न्याय संहिता २०२३ चे कलम ३१८(४), ३३६(२), ३३६(३), ३४०(२) आणि ३(५) अंतर्गत फसवणूक व जाचाचा गुन्हा दाखल करण्यात आला.

तीन राज्यांत धडक कारवाई अन् आरोपींना बेड्या

गुन्ह्याचे गांभीर्य लक्षात घेऊन दक्षिण परिमंडळ-०२ च्या पोलीस उप आयुक्त रागसुधा आर., सहाय्यक  आयुक्त रेणूका बुवा आणि पायधुनी पोलीस ठाण्याचे वरिष्ठ  निरीक्षक लक्ष्मीकांत साळुंखे यांच्या मार्गदर्शनाखाली तपासाची चक्रे वेगाने फिरवण्यात आली. तपासादरम्यान निरीक्षक अजय कदम, तपास अधिकारी  उपनिरीक्षक गोविंद फड, सहाय्यक निरीक्षक रज्जाक शेख व त्यांच्या पथकाने तांत्रिक विश्लेषण आणि गुप्त माहितीच्या आधारे आरोपींचा शोध सुरू केला.

पोलिसांच्या पथकाने तीन वेगवेगळ्या ठिकाणी धाडी टाकून आरोपींना शिताफीने अटक केली: १) तबरेज आलम अन्सारी – याला हरियाणा राज्यातून तावडीत घेण्यात आले.२) मोहम्मद शमीम अन्सारी – याला मधुबनी, बिहार राज्यातून जेरबंद करण्यात आले.३) व्यंकटेश गंगय्या चकल – याला जे. जे. डॉरमेट्री, टेमकर स्ट्रीट, मुंबई येथून अटक करण्यात आली.

बनावट कागदपत्रे अन् ५० पासपोर्ट जप्त

अटक करण्यात आलेल्या तिन्ही आरोपींच्या मुसक्या आवळल्यानंतर त्यांच्याकडून मोठ्या प्रमाणावर फसवणुकीचे साहित्य आणि कागदपत्रे जप्त करण्यात आली आहेत.

जप्त मुद्देमालाचा तपशील:

• भारतीय मूळ पासपोर्ट: ५०

• संगणक / लॅपटॉप: ०६

• मोबाईल हँडसेट: ०९

• बँक चेकबुक्स / डेबिट कार्ड / आधार कार्ड / पॅनकार्ड / व्होटिंग कार्ड: १३

• बनावट नेमणूक पत्रे (Fake Appointment Letters): ०२

फसवणुकीचा आकडा वाढण्याची शक्यता; पोलिसांचे आवाहन

अद्यापपर्यंत झालेल्या तपासात या टोळीने किमान १० नागरिकांची फसवणूक केल्याचे निष्पन्न झाले आहे. मात्र, आरोपींकडून तब्बल ५० मूळ पासपोर्ट जप्त करण्यात आल्याने, फसवणूक झालेल्या पीडितांची संख्या ५० पेक्षा जास्त असण्याची दाट शक्यता पोलिसांनी व्यक्त केली आहे. या प्रकरणात अशा प्रकारे कोणाचीही फसवणूक झाली असल्यास त्यांनी तात्काळ पायधुनी पोलीस ठाण्याशी संपर्क साधावा, असे अधिकृत आवाहन पोलिसांकडून करण्यात आले आहे.

• Labels: Mumbai Police, Pydhonie Police Station, Job Fraud Scam, Foreign Job Fraud, Mumbai Crime News, Al Shifa Travels Fraud

• Search Description: Pydhonie Police busted an interstate job fraud syndicate, arresting three accused from Haryana, Bihar, and Mumbai, seizing 50 passports.

• Hashtags: #MumbaiPolice #PydhoniePolice #JobScam #CyberCrime #CrimeNews #MumbaiCrime #FraudBusted